قال كريم حسن شحاتة إن التغييرات اللي عملها جون إدوارد في الزمالك كانت كبيرة وشاملة، وغيّرت الجهاز الفني والطبي والإداري وحتى عمال غرف الملابس، وده جزء من بناء سيستم جديد للنادي.
وأضاف إن التغيير ده شيء كويس، بس فيه منصب واحد ما ينفعش يتغير بالشكل ده، وهو مدير الكورة، لأنه لازم يكون زملكاوي ورمز من رموز النادي، مش أي اسم حتى لو محترم، زي الكابتن عبد الناصر محمد.
وأكد إن الأهلي عمره ما بيجيب مدير كورة مش من ولاد النادي، وادّى أمثلة بكابتن طارق سليم، وثابت البطل، وسيد عبد الحفيظ، ومحمد يوسف، وكلهم رموز أهلاوية. وقال: “ما ينفعش الزمالك يمحي كل الوجوه الزملكاوية من المنصب ده”.
وشدد كريم إن مدير الكورة هو واجهة النادي، وبيمثل الفريق قدام الإعلام والجماهير، وهو همزة الوصل بين الإدارة واللاعيبة والمدرب، ولازم يكون شخص قوي وتحترمه اللاعيبة، وله شخصية النادي.
واختتم كلامه برسالة مباشرة لـ جون إدوارد: “اللي بتعمله كويس، بس المنصب ده بالذات لازم يبقى معاك فيه حد زملكاوي بجد، علشان الناس ما تزعلش منك”.
