أبدى أحمد حسام “ميدو”، نجم الزمالك السابق، إعجابه الشديد بالأجواء الجديدة التي يعيشها فريق الكرة في النادي، مؤكدًا أن الانضباط والتركيز داخل المعسكر الحالي يبشران بموسم مختلف للقلعة البيضاء.
وكتب ميدو عبر حسابه الرسمي على منصة “إكس”: “اللي بيحصل في الزمالك دلوقتي عظمة، وطول عمري بحلم إن فريق الكورة يتقفل عليه، ويبقى معسكر الزمالك كأنه ثكنة عسكرية، وأنا متفائل خير إن فريق الكورة على الطريق الصحيح”.
وأضاف: “بقالنا سنين بنعاني من تسريب أخبار الفريق، وبقالنا سنين بنعاني من الناس اللي فاكرين الزمالك ورث شرعي، وإن الشغل فيه حق مكتسب حتى ولو ماعندكش أي مؤهلات”.
وأشار إلى أنه لا يتواصل حاليًا مع أي شخص داخل النادي، موضحًا أنه اختار العودة لمقاعد المشجعين فقط: “أنا والله ما ليا مصلحة مع أي حد جوه النادي دلوقتي، ولا حتى بتكلم مع أي حد جوه النادي، لا بكلم حد ولا برد على حد، وقررت إن الفترة الحالية أرجع مشجع بس.. أرجع أروح ماتشات الزمالك من غير ما يكون ما بيني ومابين أي مسؤول في النادي أي كلام”.
واختتم حديثه برسالة تفاؤل إلى جماهير الزمالك: “وأنا كزمالكاوي مبسوط جدًا ومتفائل إن إن شاء الله الزمالك بنظامه الاحترافي الجديد هيكون منافس قوي على كل البطولات اللي هيشارك فيها الموسم ده”.
