قال محمد عبد المنصف إنه مستغرب جدًا من تصريحات كابتن وائل القباني اللي خرج يتكلم عن أسرار نادي الزمالك بعد ما مشي، وأكد إن ده ما ينفعش من نجم كبير زيه، وكان لازم يقفل الموضوع ويحافظ على صورة النادي.
وأضاف: “أنا نفسي اتعرضت لظلم كبير في الزمالك ومشيت من غير سبب، ومحدش في مجلس الإدارة وقف جنبي أو حماني، بس عمري ما طلعت اتكلمت ولا فضحت اللي حصل”.
وأكد عبد المنصف إنه متفق تمامًا مع كلام كابتن طارق يحيى وجمال حمزة إن ولاد النادي لازم يكون ليهم دور، بس المشكلة مش في جون إدوارد لوحده، المشكلة في الإدارة اللي ما بتجهزش كوادر أصلاً.
وقال: “أنا كادر مفروض في حراسة المرمى، لكن الزمالك مش بيستفيد بيا، وأنا اللي بروح أشتغل على نفسي بره وأخد دورات وأطور من نفسي.. طب ليه النادي ما يعملش كده؟ ليه ما يبنيش كوادره ويشتغل على الناس بتاعته؟”.
واختتم عبد المنصف كلامه برسالة زعل واضحة لمجلس الإدارة، وقال إنه رغم كل ده بيحب الزمالك وبيدعمه دايمًا.
