شنّ وائل القباني، مدير الكرة السابق بنادي الزمالك، هجومًا غير مباشر على جون إدوارد المدير الرياضي الحالي، مؤكدًا أن قراراته جاءت قبل حتى ما يشتغل فعليًا أو يقيّم الناس.
وقال القباني في تصريحات تليفزيونية مع أحمد حسن عبر برنامج “الكابتن” على قناة dmc: “مش من الطبيعي أول ما تخش نادي تمشي الحرس القديم كله، لأنك كده بتظلم ناس من غير ما تشتغل معاهم، وده اللي عمله جون إدوارد”.
وأضاف: “أنا لما اشتغلت، مشيت إداري وعامل بعد 15 يوم بس، لما اتأكدت إنهم بيطلعوا أسرار من النادي، وسيبت الناس الأمينة، لكن هو حب يفلتر كله مرة واحدة، وده غلط”.
وتابع: “اللي بيعمل كده بيكون مش قادر يميز، وده معناه إنه شايف إن كل أولاد نادي الزمالك مش كويسين، وده ظلم كبير، لإن في ناس محترمة جدًا جوه النادي وبتحب الكيان بصدق”.
وأوضح القباني أن السبب في رحيله هو المدير الرياضي، قائلاً: “كان في ناس من مجلس الإدارة ولجنة التخطيط عايزيني، لكن جون إدوارد كان عايز تغيير شامل، والكل وافق على كلامه لأنه ماسك ملف الكورة بالكامل”.
