شن الكابتن شريف عبدالمنعم، نجم الأهلي السابق، هجومًا لاذعًا على أداء الفريق الأحمر ومدربه البرتغالي خوسيه ريبيرو، عقب الخسارة أمام بيراميدز في الدوري المصري الممتاز، مؤكدًا أن الوضع لم يعد يحتمل أي صبر جديد.
وقال عبدالمنعم خلال تحليله عبر شاشة الحياة:
> “الحقيقة أنا زعلان جدًا.. من أول الموسم كان عندنا إنذار من أول ماتش مودرن لحد المحلة، لكن للأسف الإحساس اللي متسرب للاعيبة إنهم سكواد جامد جدًا ويقدروا يكسبوا في أي وقت بدون مجهود”.
وأضاف:
> “في مدرب بييجي يكون له حظ.. ياخد بطولة سوبر أو يكسب مباراة في أفريقيا تديله علامات نجاح. لكن أعتقد إن المدرب ده غير موفق تمامًا. النهارده أنا مش شايف أي حاجة من الأهلي، لا نص ملعب ولا شكل هجومي. لولا وجود ديانج كانت النتيجة تبقى خمسة”.
وخلال الحوار، تساءل الإعلامي كريم شحاتة حول وجود بعض الأصوات داخل النادي التي تطالب بالصبر على ريبيرو، ليقاطعه شريف عبدالمنعم قائلاً:
> “لا.. مفيش صبر خلاص. مش بمزاجك. بقى مطلب جماهيري. أول مرة أشوف الأهلي كده بالسوء ده”.
واختتم تصريحاته:
> “الأهلي بيلعب كورة واحدة بس أو كورتين بالكثير، مفيش أي تنوع. محمد يوسف وعماد النحاس كانوا ناجحين قبل ما ريبيرو ييجي، وكنت بطالب إنهم يستمروا في كأس العالم للأندية بدل ما نشوف الحالة دي”.
