كشف حسام المندوة، امين صندوق الزمالك، عن تحرك جديد من مجلس الإدارة بشأن سحب ارض النادي في السادس من اكتوبر.
وقال المندوة، خلال مداخلة هاتفية ببرنامج “الكورة مع فايق”، عبر قناة “mbc مصر2″:” موضوع ارض اكتوبر كان في جلسه مع وزير الإسكان ومن ثم جلسه مع وزير الشباب والرياضة اتكلمنا عن موقفنا وأننا استلمنا النادي في اخر 2023 وصدر قرار الوزاري لينا علشان نشتغل في الأرض في شهر أربعه 2024 ودفعنا الرسوم الخاصه بيها “.
واضاف:” وفي شهر 4 لسنه 2025 اتوافق على البدء في المشروع وحصلنا على موافقات وزارية ومش منطقي يطلع قرار بعدها بتراجع بشهرين ويتم سحب الأرض بعدها بشهرين كمان “.
وأردف المندوة:” إحنا عملنا تعاقدات مع عدة جهات واتفاقات وكانت الملاعب هتخلص في اخر شهر عشرة وكل ده وقف حالياً “.
وأكمل :” محصلشي رد نهائي من وزير الإسكان في جلسته معانا بخصوص مصير الأرض، وبكره هنقدم تظلم جديد على قرار الوزارة”.
وردا على سؤال الناس بتحمل المجلس المسئولية بسحب الارض اجاب المندوة: “استلمنا في نوفمبر 2023 وكان المفروض في خطاب مدته تنتهي بعد 3 ايام، هل نلحق نخلص؟ وبعدها عملنا تعاقدات علشان نقدر نوفر سيوله لبناء129 فدان وبدانا نعمل اتفاقيات، فين خطأ المجلس؟”.
واستطرد:” اسلتمنا وتعاقدنا وسط ظروف سوداء والتعاقدات مكنتش في يوم وليله في ظل مشاكل كثيره وكان علينا طعون علي المجلس اخدت 7 شهور، احنا تعاقدنا مع جهات حكوميه وبنوك، ولاعملنا فندق ولا كمبوند”.
وزاد المندوة: ” إحنا مستلمين النادي في مشاكل مالية كبيرة وخدنا مجهود كبير علشان نقدر نعمل كل الاتفاقيات دي والخطوات دي علشان نبدأ في بناء الأرض”.
وأتم: “احنا هنعمل تظلم هيتم رفعه لوزير الاسكان وهو هيرفعه لرئيس الوزارء وسيادة الرئيس، موعد الرد على التظلم؟ الرد هيأخد وقت واتمنى القياده السياسه تعرف انه وموضوع الأرض هو حياة أو موت لنادي الزمالك وناشدنا سيادة الرئيس للتدخل، مش عاوزين دعم وناخد فلوس عاوزين دعم ان اخر خطاب جه لنا احنا ملتزمين به”.
