فتح سيد عبد الحفيظ، مدير الكرة السابق بالنادي الأهلي، النار على أداء الزمالك بعد القمة، مؤكدًا أن الفريق الأحمر استعاد شخصية البطل بروح الفانلة الحمراء، مشيرًا إلى أن التاريخ لا يكذب وأن الزمالك لم يعرف الفوز الكبير على الأهلي منذ نصف قرن، كما وجّه عدة رسائل للاعبي الأحمر وللجهاز الفني حول المرحلة المقبلة.
وقال سيد عبد الحفيظ في تصريحات عبر برنامج “اللعيب” على قناة “mbc masr”: “أهم ماتش بالنسبة ليا هو الماتش الجاي قدام كهرباء الإسماعيلية. المشكلة إنك تعيش في حالة وتبني عليها قدام، الزمالك عاش حالة وفرحة، بس ده مش واقع. الزمالك بقاله 50 سنة مكسبش الأهلي بسكور، ومن سنين طويلة ماكسبش 3 ماتشات ورا بعض”.
وتابع: “ماتش الزمالك ليه وضع خاص، طبيعي تبقى قلقان، بس الطبيعي كمان إن الأهلي متماسك وبروح الفانلة الحمرا. أكتر حاجة فرحتني امبارح إن الأهلي رجع بروحه. من 37 سنة الأهلي لما بيتقدم الزمالك ما بيرجعش في النتيجة، وفي 30 سنة الزمالك ما رجعش ولا اتعادل غير 3 مرات بس”.
وأضاف: “الأهلي في الماتش قدم روح عالية جدًا. أول 5 دقايق ماكانوش في الجيم، وبعد كده احتلوا الملعب بالطول والعرض. والزمالك ماخدش ولا كورة ركنية”.
وأردف ساخرًا: “أنا الصبح قمت اتفرجت على الماتش تاني، قلت يمكن الزمالك يجيب سكور في الإعادة! الماتش أثبت إن الموضوع موضوع فانلة، بغض النظر مين بيلعب، الفانلة هي اللي بتديك القوة”.
وواصل: “حسين الشحات كان مركز جدًا وغير كل حاجة في الماتش. كوكا رغم إنه ماعملش هجوم كتير، بس عمل كل حاجة، خلّى خوان ألفينا مايلفش خالص وكان دايمًا ضهره للمرمى. مروان عطية والشناوي أدوا بشكل رائع. بن شرقي في الشوط التاني في الدقيقة 59 رجع بسرعة، وفي لقطة البنالتي ثبت المعلومة عند الحكم وقاله دي نفس كرة الزمالك، وده واحد صايع كورة”.
وأردف: “تريزيجيه عنده شخصية قوية جدًا، وهو عنصر مهم جدًا وممكن يبقى هداف الدوري. بس عايز أقولك يا تريزيجيه: ماتشيلش فوق طاقتك. وزّع الشيلة عشان تخف، إنت عنصر مهم، بس لازم ناخد منك أحسن حاجة”.
وبسؤاله: الأهلي مش عارف يجيب مدرب؟ أجاب: “الموضوع عندنا إننا نختار مدرب عنده شخصية وشطارة. ممكن السيرة الذاتية تبقى كويسة، بس لازم يستوعب الجو هنا. وأنا متأكد إن الاختيار هيبقى صح. قدامنا فترة توقف. وعايز أقول لازم ندي عماد النحاس حقه، الراجل مسك آخر 6 ماتشات الموسم اللي فات كسبهم كلهم، والسنة دي مسك 4 ماتشات كسب 3 واتعادل ماتش، فالراجل ليه كل التحية والتقدير”.
واختتم: “لازم كل لاعيبة الأهلي يعرفوا إن الماتش الجاي أهم من ماتش الزمالك، عشان تصدر الضغط، ولما تعمل كده هتلاقي المنافسين هما اللي بيقدملك الهدايا”.
