أزمة في الزمالك تنفجر على الهواء.. أحمد سليمان يكشف أسرار عقد جون إدوارد ومشكلة مستحقات اللاعبين! فيديو
شهد برنامج اللعيب على قناة “MBC مصر” نقاش ساخن حول أزمة مستحقات لاعبي الزمالك، بين الإعلامي مهيب عبد الهادي وضيوفه أحمد سليمان ومحمد عمارة.
مهيب بدأ بسؤال مباشر: “الفلوس في نادي الزمالك ومستحقات اللعيبة.. المسؤول عنها مجلس الإدارة ولا جون إدوارد؟ خصوصًا إن امبارح النادي طلع بيان واعتذار لجون واللاعيبة علشان يصبروا شوية.”
أحمد سليمان رد وقال: “موضوع أرض أكتوبر عمل أزمة مالية كبيرة، كان فيه استثمارات وتعاقدات المفروض يحصلوا، لكن كله اتعطل. بس ده مش جديد على لاعيبة الزمالك الرجالة، دايمًا بيتحملوا. لو نفتكر لما خدنا بطولة إفريقيا والسوبر، اللعيبة كانوا بقالهم سنة ونص ما قبضوش، والأستاذ ممدوح عباس دفع حوالي 80% من العقود وساعدنا نكمل ونجيب بطولات.”
وأضاف: “دلوقتي الوضع أصعب، لأن فيه تعاقدات جديدة واللاعيبة الجداد طبيعي مش هيستحملوا زي القدام. في الآخر مجلس الإدارة هو المسؤول، بس جون عنده عقد 3 سنين كمدير رياضي.”
وهنا استفسر محمد عمارة: “يعني مجلس الإدارة عامله عقد؟”، فرد سليمان: “آه طبعًا، عقد 3 سنين.”
مهيب عبد الهادي عاد وسأل: “طيب مين المسؤول عن مستحقات اللعيبة؟”، فقال سليمان: “الاتنين المشرفين على الفريق، حسين لبيب وحسين نصر، والعقد بيأكد مسؤوليتهم، ولو حصلت مشكلة بيرجعوا لمجلس الإدارة.”
وبسؤاله عن جون، أوضح: “لا جون مش مسؤول عن فلوس المجلس، وفيه تفاصيل في التعاقدات مش هينفع أقولها.”
وفي ختام الحوار، فتح مهيب ملف أزمة شيكو بانزا، ليرد سليمان: “خلاص الموضوع انتهى، واللاعب موجود في القايمة. وده معناه إن الأزمة كلها اتقفلت سواء كانت عقوبة أو مشكلة مالية.”
