هاجم أسامة حسني، لاعب الأهلي السابق، الإعلامي مدحت شلبي بعد تصريحاته الأخيرة التي شكك فيها بخصوص سبب غياب محمود الخطيب عن السفر إلى الولايات المتحدة مع بعثة الأهلي. وجاء ذلك خلال ظهوره في برنامج اللعيب على قناة MBC مصر.
وقال أسامة حسني: “بعد إذنك بس قبل ما تختم يا أستاذ مهيب، يعني وهنا إم بي سي محطة كبيرة ومحترمة وليها متابعين كبار، يعني امبارح كان الكابتن مدحت شلبي أثار في برنامجه بعض الكلام، يعني المغلوط وغير صحيح، ومفروض يعني قبل ما يطلع يتكلم لازم يكون متأكد من معلومته”.
ورد مهيب عبد الهادي: “أيوه بس هو يعني له كل الاحترام والتقدير، يعني ليه بقى إعداده ومصادره، وهو إعلامي كبير. ليعلق حسني قائلاً: “هو غاب عن برنامجه أو عن الإعلام حوالي شهرين أو ثلاثة، عايز يرجع يقول للناس أنا موجود”.
فأوضح مهيب: “لا، هو كان في إجازة. ليعود أسامة حسني قائلاً: “كان في إجازة، ما أنا بقول لك، هو كان في إجازة وعايز يرجع للناس يقول أنا موجود. فأنا بعذره إنه عايز يحسس الناس إنه موجود في الإعلام الرياضي. هو امبارح اتكلم وقال أصل الكابتن محمود الخطيب دعى المرض وقت سفريه أمريكا وهو الراجل أصلاً ما خدش تأشيرة أمريكا”.
وأضاف: “لكن أنا النهاردة وأنا معاك على الهواء إن أنا وقتها كنت أنا يعني بخلص إجراءات الكابتن محمود الورقية في السفارة والكلام ده كله. فأنا بس عايز أوريك، اتفضل كده شوف كده على الهواء، بتشوف ولا تلبس النظارة؟ “أنا هلبس النظارة.”
فأبرز أسامة حسني التأشيرة على الهواء من هاتفه قائلاً: “دي تأشيرة مين؟” ليرد مهيب: “دي تأشيرة كابتن خطيب.” فأكمل حسني: “من كام لكام؟” فأجاب مهيب: “27 أبريل 2025 لغاية 22 أبريل 2030.”
ليختم أسامة حسني: “وأنا هنا كده لو الناس عايزة تشوفها، يعني لو مش عايزين زوم وخلاص، لكن أنا وريتها لك على الهواء عشان يعني الكابتن مدحت المفروض أنت في محطة كبيرة، المفروض يستلزم إنك تتأكد من معلومتك. لكن أنا بفسر يعني اللي هو، إنه غاب بقي له حوالي شهرين ثلاثة، فهو عايز يرجع للناس يقول أنا موجود”.
