فتح أيمن عبد العزيز، نجم الزمالك السابق، النار على المدير الفني يانيك فيريرا بعد الخسارة أمام الأهلي، مؤكدًا أن الفريق الأبيض كان قادرًا على حسم القمة مبكرًا لولا إهدار الفرص، لكنه اصطدم بغياب الحلول من على دكة البدلاء وقرارات فنية وصفها بـ”الكارثية”.
وقال أيمن عبد العزيز في تصريحات عبر برنامج “اللعيب”: “أنا لما قلت الزمالك يقدر يكسب بسكور، كنت بتكلم على الفنيات. أول 10 دقايق الزمالك كان ممكن يخلص الماتش، بعد الجون عدي وناصر ضيعوا فرص كتير”.
وتابع: “كنت زعلان جدًا بعد الماتش. المدرب كشف اللاعيبة، وأوقات كتير حالة المدرب بتفرق في الماتش. من بعد الدقيقة 12 الراجل قاعد بيتفرج زينا، ومعملش أي تدخل عشان يعدل رغم المشاكل اللي كانت واضحة”.
واستكمل: “الشوط التاني، لما تحس إن فيه انهيار في الفريق، ولو إنت مدرب ومعملتش أي رد فعل أو تدخلات عشان تصلح، تبقى ماتستهلش تدرب الزمالك”.
وأشار: “يانيك فيريرا أول ما جه كان واقف على الخط متوتر ومتحمس، دلوقتي واقف إيده في جيبه وتحس إنه متكبر ومتعجرف”.
وأردف: “الكارثة الكبيرة إنه أول تغيير نزّل ناصر منسي وهو مش جاهز، تحس إن حد قاله إن ناصر كعبه عالي على الأهلي، فراح نزّله دلوقتي، لكن ده لعبه وهو مش في حالته”.
وواصل: “أنا مش زعلان من الخسارة في حد ذاتها، اللي زعلني إن فيريرا وصل اللاعيبة للحالة دي. كارثة إنه فرّغ نص الملعب في عز ما عبد الله السعيد كان تعبان، خرج دونجا! الراجل مش في دماغه حاجة، واضح إنه مش عارف يعني إيه ماتش قمة ولا عارف أهميته”.
وأتم: “ماتش امبارح كشف اللاعيبة، آدم كايد تحس إنه لسه عيل صغير معاك، لسه طري. لو الإدارة مصممة ماتمشيش فيريرا، يبقى ده عناد. من الأول قلنا الزمالك تقيل عليه. إنت داخل على فترة توقف، هات مدرب جديد محلي، يكون فاهم النادي وجماهيره”.
