علق وليد صلاح الدين، لاعب الأهلي السابق، علي قرار تعيينه مديرا للكرة بالنادي الاحمر، في الجهاز الفني المؤقت بقيادة عماد النحاس، خلفا للإسباني خوسيه ريبيرو.
وقال صلاح الدين، خلال مداخلة هاتفية ببرنامج “ملعب أون”، عبر قناة “أون سبورت”:” وجودي في منصب مدير الكرة، مسئوليه كبيره ومحتاج دعوات الجميع، بشكر زد ومسئوليه ومستر انسي ساويرس ودكتور احمد عبدالله وسيف زاهر وبشكركم على السنين الماضية”.
واضاف:” اتفقت مع مسئولي زد من اربع سنين وقولت لهم اطمنوا انا بدون امضا مش همشي الا للاهلي اومنتخب مصر، حلم لاي حد من ابناء الاهلي وفي اساطير كتير تولوا المنصب ده ومن بينهم كابتن الخطيب وان شاء الله اجتهد علشان انجح”.
وشدد صلاح الدين: “طبيعي على ولاد الاهلي ميتكلموش في فلوس، ولازم ارد الجميل للنادي، وانا في دبي وهارجع اقعد مع كابتن خطيب ومحمد يوسف، اي حد بيطلبه الاهلي لازم يلبي، وتاريخي كله والخير اللي انا فيه من الاهلي فلازم ارد الجميل، وهطلع خبراتي اللي تعلمتها علشان انجح وافيد المكان”.
وتابع:” من اول يوم في زد اتفقنا على الشغل الصح والثبات الانفعالي، وعدينا بمراحل كثير والهدوء بتاع مستر انسي ساويرس وهيثم عبدالعظيم سبب النجاح وزد حط اسمه بشكل كبير في الدوري وكل الشكر والتقدير”.
وأشار صلاح الدين: “الاهلي كبير القاره الافريقية، كل العالم عاوزه تتعامل مع الاهلي، والناس مش مصدقه ان زد يحط رجله ف الدوري، ورحل اكثر من لاعب للزمالك والاهلي وبشكر كل الطاقم الاداري والطبي وكل من عمل معي في زد على مدار 3 سنين”.
وأردف:” تأتي متاخره افضل ألا تأتي واري انه من المفروض منذ فتره طويله اتواجد في المنصب ده، وربنا بيختار التوقيت، وان شاء الله اعمل حاجه، ولا اشعر بالقلق وواثق من النجاح، لان الاهلي يمتلك كل شئ، الجمهور واثق انك مع الاهلي لاتقلق، عندك مجلس ادارة قوي ولعيبه الافضل في افريقيا ولا خوف على الأهلي”.
وأختتم: “الاهلي 24 ساعه والشاشه هتوحشني لكن الاولويه للاهلي، كل عمل ولها السيستم الخاص بها وهحضر شغلي وهعرضه على كابتن محمد يوسف”.
