حسام غالي عن ترشحه لرئاسة الأهلي: “في خناجر بتتحط في الضهر.. ومش مستعد لحرب غير شريفة”!!
تحدث حسام غالي، عضو مجلس إدارة النادي الأهلي، عن إمكانية ترشحه لرئاسة القلعة الحمراء مستقبلًا، مؤكدًا أن الفكرة تمثل له طموحًا شخصيًا، لكنه لا يرى نفسه مستعدًا لخوض هذه الخطوة في الوقت الحالي.
وقال غالي في تصريحات إعلامية: “الكلام عن تحضيري لرئاسة الأهلي بالفعل بيضع ضغط كبير عليّ، وبالتأكيد نفسي أخدم النادي زي ما خيره عليّا إنه وضعني في المكانة دي أمام الجماهير. ناس كتير وضعت آمال كبيرة عليّا، وأنا شايف نفسي رئيس الأهلي وممكن أحقق طموح الجماهير اللي شايفاني رئيس النادي.”
وأضاف: “لما دخلت في الإدارة وشوفت الدنيا على حقيقتها، حسيت إني مش قادر أمسك سيف ودرع وأدخل المعركة دي حاليًا. طول عمري بحارب من وقت ما كنت لاعب صغير لحد ما اعتزلت، وما أخدتش استراحة محارب بعد ما بطلت كورة، ودخلت مباشرة في العمل الإداري.”
وأوضح غالي: “عندي الرغبة إني أبقى رئيس الأهلي في يوم من الأيام، لكن حاليًا مش قادر أدخل المعركة بعد ما شوفت صراعات كبيرة وتكالب من ناس كتير. في خناجر بتتحط في الضهر، وأنا عمري ما هحارب بحروب غير شريفة، حربي دايمًا وجها لوجه وبمجهودي وعرقي هاخد اللي أنا عايزه.”
