خرج خالد الجوادي، مترجم السويسري مارسيل كولر المدير الفني السابق للأهلي، عن صمته بعد الانتقادات التي وُجهت إليه مؤخرًا على خلفية حديثه عن فترة عمله داخل القلعة الحمراء، مؤكدًا أن ما يثار حوله لا يعدو كونه افتراءات وظلمًا بحقه.
وقال الجوادي عبر حسابه على “فيس بوك”: “بصراحة كنت ناوي اتجاهل التعليقات السلبية واللي وصلت إلى حد الاتهامات والتجريح واكتب توضيح واحد بعد نزول الجزء الثاني من الحلقة، لكن بصراحة كم الظلم والافتراء خلاني مليان كلام كتير فقلت اطلع جزء من اللي جوايا قبل نزولها”.
وتابع: “الاتهام الأول: أول مترجم في تاريخ الأهلي يطلع يتكلم في الإعلام ويحكي! اتهام كذب واللي بيقوله اما مش متابع أو مدلس.. أكبر 3 مترجمين في تاريخ النادي وأفضلهم من وجهة نظري أستاذ محسن طنطاوي وأستاذ أحمد عبده ود. عمرو محب كلهم على رأسي وأساتذة بنتعلم منهم الشغلانة لهم لقاءات إعلامية لا حصر لها ومنهم اللي عمل بودكاست مع شادي حبشي نفسه وادخل على يوتيوب وشوف بنفسك… فبلاش افتراء علي”.
وأضاف الجوادي: “الاتهام الثاني: أول حد في تاريخ الأهلي يطلع يتكلم في الإعلام! اتهام كذب زي اللي قبله. أعضاء لجنة التخطيط ومديرين الكورة ورئيس الاسكاوتنج وطلعوا وحكوا تفاصيل عادي جدًا ومنهم في قناة النادي نفسها… فبلاش افتراء علي بجد”.
واستكمل: “الاتهام الثالث: ده غاوي شهرة ومريض شهرة! اللي غاوي شهرة ده يطلع كل يومين في الإعلام… يفتح قناة على يوتيوب ويحلل كل يوم أو بعد كل ماتش… واتعرضت علي بالمناسبة ورفضتها… ده أنا قناتي على يوتيوب الموجودة قبل شغلي في الأهلي (تاريخ مصر أرض كمت) ما رجعتش اعمل فيديوهات عليها تاني”.
وقال الجوادي: “الاتهام الرابع: ده بيطلع كل شوية وكفاية بقى!، إيه الظلم ده؟؟؟ أنا ما طلعتش على الشاشة إلا مرتين فقط مرة في أغسطس 2024 والثانية الآن بودكاست شادي حبشي سبتمبر 2025… يعني آخر مرة من سنة وشهر… مرتين فقط لا خمسة ولا كل شوية”.
وأوضح: “الاتهام الخامس: إزاي تطلع أسرار أوضة اللبس ودي خيانة أمانة!، التعبير ده مكنش موجود في الميديا وتم اختراعه مخصوص عشاني من سنة… اللي بيتحكي لا أسرار حربية ولا معلومات بتضر أي حد كلها قصص توضح إنك معك إدارة عظيمة وكان عندك جهاز عظيم… الأسرار اللي بجد بقى واللي اعرفها حتدفن معايا في القبر”.
وأردف الجوادي: “على فكرة مفاجأة للبعض: الكورة صناعة ترفيهية مش دين وعقيدة… الكورة ترفيه مش دين!!!!! وسؤالي لبعض الإعلاميين واليوتيوبرز اللي بيزعقوا: أخباركم الحصرية بتجيبوها منين؟ مش من مصادر جوه النادي برضه؟؟ ولا بتحلموا بيها بعد صلاة الفجر؟؟… أقسم بالله كنت أيام ما كنت في النادي بعرف أخبار بتطلع صح 100% عن الفريق أنا والمدير الفني نفسه مكناش نعرفها وبنعرفها منكم”.
واختتم الجوادي تصريحاته قائلاً: “ملحوظة أخيرة: أنا عمر ما حد من إدارة النادي وكل الإدارة معها رقمي كلمني أو بعت لي رسالة يطلب إني ماطلعش في الإعلام… واهو باعلنها لو إدارة النادي مش عايزني أطلع خالص وماظهرش أبدا رقمي معهم مجرد رسالة وأنا سأمتثل فورا حتى لو ده مش فير بس طلبات الأهلي عندي أوامر”.
