كشف الإعلامي أحمد شوبير آخر التطورات داخل النادي الأهلي بشأن اختيار المدير الفني الجديد، مؤكدًا أن الاجتماعات داخل القلعة الحمراء كثيفة والخيارات مطروحة بعناية.
وقال شوبير عبر إذاعة “أون سبورت إف إم”: “فيه اجتماعات كتير شغالة داخل الأهلي عشان يختاروا خليفة ريبيرو، وهقول لك الدنيا ماشيه ازاي. الاتجاه الغالب هو مدرب أجنبي، وكان المفروض المدرب ده يبدأ التمرين بعد الإجازة يوم الخميس، بس بعض الأصوات قالت: لا، ما تستعجلوش، خليكوا هاديين شوية، خطوة خطوة لحد ما نشوف الأمور هتتحرك إزاي”.
وأضاف: “الأهلي شكل جهاز كامل: كابتن عماد النحاس، كابتن عادل مصطفى، كابتن محمد نجيب، كابتن أمير عبد الحميد، ومعاهم اثنين للأحمال: عبد الرحمن عيسى والشيحي، والنجم الكبير وليد صلاح الدين مدير الكرة، وكابتن محمد يوسف مدير رياضي للفريق، وأسامة هلال رئيس إدارة السكوتنج والقائم بأعمال مدير التعاقدات. الكل نصح بالهدوء عشان الأمور تمشي صح”.
وتابع شوبير: “الهدوء ده معناه إنهم هيصبروا على كابتن عماد النحاس شوية لأنه ليه تجربة ناجحة قبل كده. طب هل الأهلي مش هيجيب مدرب أجنبي؟ لا، بيتفاوض على راحته، ومفيش استعجال”.
وأشار شوبير إلى أن المدرب الجديد هيكون رقم 12 في قائمة المديرين الفنيين اللي تعاقبوا على الأهلي في عهد كابتن محمود الخطيب، بعد حسام البدري، باترس كارتيرون، محمد يوسف مؤقت، مارتن لاسارتي، رينيه فايلر، موسيماني، سامي قمصان مؤقت، سوارش، مارسيل كولر، عماد النحاس مؤقت، وخسي ريبيرو. وأوضح: “بعضهم كان مؤقت، وذكرناهم من باب التكريم بس”.
وأضاف: “المدرب الجديد لازم ياخد خطواته بهدوء، وما نستعجلش، لحد ما كل حاجة تتضح. لجنة السكوتنج والتعاقدات شغالة على ترشيح أسماء كل يوم، وبتوصلهم CVs كتير، بصراحة تعبت من كتر الرسائل دي، وأي حد يبعت لي CV لعيب أو مدرب، أنا أصلا مش ببص فيها وما ببعتهاش لأي حد، مش مسؤوليتي”.
واختتم شوبير: “في ناس فاكرين أنهم عارفين كل حاجة عن الموضوع، بس الحقيقة غير كده، الأمور ما زالت شغالة وفق خطة منظمة”.
