شن الإعلامي أحمد شوبير هجومًا لاذعًا على آدم وطني، وكيل اللاعب إمام عاشور، بعد التصريحات التي خرج بها مؤخرًا بشأن مستقبل نجم الأهلي المصاب. وأكد شوبير أن ما فعله الوكيل يمثل “أزمة بدون لازمة”، مشيرًا إلى أن الأولوية الآن يجب أن تكون للاعب وصحته، وليس لملفات العقود والانتقالات.
وقال شوبير في تصريحات عبر برنامجه الإذاعي صباح اليوم: “امبارح طلع آدم وطني، اللي هو بقى وكيل الإمام عاشور. آدم ده اللي كان الوسيط في قصة وسام أبو علي، طلع بقى يتكلم وشغلانة وحدوتة، فبرضه أزمة بدون لازمة”.
وتابع: “إمام فاضله سنتين ونص في عقده. دلوقتي أنت تتمنى للإمام الشفاء. أنا مش عارف، وكيل برده! الوكيل ده لازم دماغه تبقى مظبوطة. يعني إنت اللعيب بتاعك تعبان، وراجل محجوز في المستشفى من يوم مباراة الأهلي وإنبي. فالراجل تعبان، مريض”.
وأضاف: “لا وقت إن أنا أتكلم على عقود، ولا ده يتنقل هنا ولا هناك. اعمل شغلك زي ما أنت عايز، لكن اختيار التوقيت مهم جدًا. مش وقته خالص ولا أوانه خالص. غريب قوي التوقيت بتاع الكلام. معايا، لا، مش معايا، لا، يسافر، لا يعمل. تعبان. إمام تعبان في مستشفى. الحمد لله الأمور تمام، تحت السيطرة، والدنيا بفضل الله كل يوم أحسن”.
وواصل: “والأهلي خلاص قال لك: “أنا بقفل الملف ده”، ما هو أولى إن أنا أستنى الراجل يطلع من المستشفى. إمام على الأقل شهر على ما تشوفه في الملعب. على الأقل شهر. يعني أنا بقيت كمان الآن قلقان في موضوع بطولة الأمم الإفريقية. نعم، بطولة الأمم الإفريقية”.
وأشار: “آه، هيكون طلع واتمرن والموضوع يبقى بخس جدًا، وعلى ما ترجع بقى من أول وجديد. وإمام أصلًا ضعيف، يعني ضعفان، مش قوي”.
واختتم: “فالسيد الفاضل مدير أعمال أو وكيل أعمال أو وكيل اللاعب إمام عاشور، ممكن حضرتك تسكت شوية لحد ما نطمن على الولد، ويبقى تمام التمام، ويرجع يطلع ويلعب ويبقى زي الفل. وبعد كده يا سيدي يبقى اتكلم. يعني اختيار التوقيت المناسب مهم جدًا في إثارة الموضوع”.
