قبل ساعات من القمة المنتظرة بين الزمالك والأهلي، أدلى الإعلامي الأحمر أحمد شوبير بتصريحات مثيرة عبر برنامجه الإذاعي، حلّل خلالها أوراق القوة ونقاط الضعف في الفريقين، محددًا اللاعبين الأكثر خطورة داخل المستطيل الأخضر.
شوبير في تصريحاته عبر برنامجه الإذاعي النهارده الصبح (الاثنين) قال: “مين الأخطر في الأهلي ومين الأخطر في الزمالك؟.. في الأهلي مفيش كلام، الأخطر هو تريزيجيه، وفي الزمالك عندك 3 لاعيبة: عبد الله السعيد، ناصر ماهر، وخوان بيزيرا”.
وكمل: “تريزيجيه هو رقم واحد في الأهلي، وكمان ياسر إبراهيم في الكرات الثابتة، وبعده أشرف بن شرقي، لكن رقم واحد واتنين وتلاتة هو تريزيجيه، وبعده بن شرقي”.
وأضاف: “لو بصينا على أسلحة الفريقين: الزمالك عنده أطراف قوية جدًا زي محمود بنتايج وعمر جابر، والأهلي عنده محمد هاني، بس بيعاني من أزمة كبيرة في الجبهة الشمال، لأنه معندوش باك شمال صريح، ساعات كوكا لاعب الوسط بيشارك في المركز ده، وأوقات مصطفى العش قلب الدفاع، لكن مفيش لعيب أساسي في الحتة دي، وبالتالي الأهلي مش عنده جبهة يسرى هجومية حقيقية”.
وقال كمان: “أما الزمالك فعنده بنتايج، وكمان آدم كايد اللي أثبت نفسه كويس جدًا، وأطراف زي عمر جابر ومحمود بنتايج.. الأهلي عنده محمد هاني بس. عبد الله السعيد متقوليش بقى شهادة ميلاد.. دماغه هي اللي ماشية اللعبة كلها. أنا استمتعت بيه في كل المراحل: الإسماعيلي، الأهلي، بيراميدز، الزمالك، والمنتخب. لاعب ممتع جدًا”.
وتابع: “ناصر ماهر بيقدم موسم ممتاز جدًا، ومصدر خطورة كبيرة خصوصًا ناحية اليمين، بيشتغل كويس مهاجم وهداف، وآدم كايد برضه عامل شغل كبير”.
وأكد: “الزمالك بشكل عام متجانس. آه اتعادل مع الجونة، بس ضيّع أهداف كتير، والجونة كمان كان عنده كرتين في العارضة ومحمد صبحي صد كرات خطيرة، لكن الشكل العام للزمالك متوازن، وأعتقد إن جوانب الخطورة عند الزمالك أكبر”.
وأشار: “الأهلي لو حسين الشحات لعب وهو في حالته، هيبقى خطير جدًا، ولو محمد شريف رجع لذاكرة التهديف، برضه هيبقى خطير”.
وأكمل: “ممكن ناس تسأل ليه مش ذكرت محمد علي بن رمضان.. لأنه أدواره دفاعية أكتر، ومعاه مروان عطية برضه أدوارهم دفاعية في النص. الأهلي مشكلته في الدفاع، مش واضح هيبدأ بمين. عندك ياسر إبراهيم كويس، ياسين مرعي كويس، لكن كوكا عمره ما يتحسب على الدفاع.. ودي مشكلة”.
وأضاف: “أنا شايف إن الأهلي كان لازم يفضل على علي معلول، رغم إنه اتصاب مرتين في تونس وغايب من فترة. لو كان استمر مش هيبقى أساسي على طول، لكن كنت هتستفيد منه في ماتشات معينة. أنا واحد من اللي بيعشقوا علي معلول، بحبه جدًا. بس في رأيي استمرار يحيى عطية الله في الأهلي كان أهم، أو حتى كريم الدبيس، بس هو كمان مصاب مع سيراميكا”.
وأوضح: “أما بالنسبة للأجانب: الأهلي عنده أشرف بن شرقي ومحمد علي بن رمضان بس. المصابين زي أشرف داري على طول مصاب، وجراديشار دخل في دايرة الإصابات. الظروف دي بتخلي الزمالك أكثر ثبات فني، عنده استقرار في التشكيل، بس برضه بيضيّع نقاط غريبة جدًا”.
واختتم شوبير كلامه: “الماتش 50-50، ممكن تميل شوية للزمالك بسبب الاستقرار الفني جوه الملعب، لكن في الآخر ماتش القمة بين الأهلي والزمالك عمره ما بيتحسب أو يتوقع”.
