زفّ الإعلامي أحمد شوبير، عبر برنامجه الإذاعي صباح اليوم، خبرًا سعيدًا لجماهير نادي الزمالك بشأن أزمة أرض السادس من أكتوبر، كاشفًا عن تفاصيل الاتصالات الأخيرة بين الجهات المسؤولة وإدارة النادي، والاتجاه القوي لعودة الأرض بشروط محددة.
وقال شوبير في تصريحات عبر برنامجه الإذاعي صباح اليوم: “خبر سعيد للزمالكاوية. قول لنا؟ هقول لكم. بخصوص أرض أكتوبر: الاتصالات الأخيرة اللي كانت ما بين وزير الإسكان – اللي هو ماسك الملف – وسيد وزير الشباب والرياضة اللي بيحاول المساعدة بكل الطرق، وإدارة نادي الزمالك، بيتم عرضها على مجلس الوزراء. وأنا قلت لكم هنا: الصمت أفضل من الكلام”.
وتابع: “هناك اتجاه لعودة أرض النادي، لكن هناك شروط محددة بمقترحات ممكن يتم الاستقرار عليها والإعلان بشكل رسمي خلال الفترة المقبلة. طب بشرنا يا عم! بص يا سيدي: هيبقى في برنامج زمني مقدم من مجلس الزمالك، ويتم متابعة معدلات التنفيذ وسير العمل في الفرع كل قد إيه؟ كل 3 شهور. نعم، كل 3 شهور”.
وأضاف: “هل عدم الالتزام بالجدول الزمني سيتم سحب الأرض من الزمالك بشكل نهائي؟ يعني: أنا هديلك 3 شهور، اشتغل يا عم، واديني تقرير بعد الثلاث شهور. إنت بتقول لي: أنا هعمل كذا وكذا وكذا. بثلاث شهور، حاضر. وده على فكرة نهج رائع من الدولة”.
وشدد: “هيتم منح النادي مهلة لاستكمال المنشآت في الجزء الرياضي، بنسبة 80% من أرض المشروع. يعني 80% من الأرض دي للرياضة: الملاعب والمباني الرياضية وكل ده”.
وأكد: “وربما يتم الاتفاق على دفع مبلغ مالي من جانب نادي الزمالك لهيئة المجتمعات، سواء بقيمة مالية أو بجزء من الشق الاستثماري في النادي. بمعنى: النهاردة مثلًا أقول لك: هتدفع لي 10 قروش. تقول لي: معنديش. طيب يا حبيبي، أنا هاخد من الجزء الاستثماري، وأنا اللي أقدره”.
وأردف: “فده خلاص شبه “الديل” اللي بيتعمل عشان المشروع يستكمل من جديد. وبالتالي النادي منتظر عودة الأرض، لأنها الضامن الوحيد إن الفلوس تعود مرة أخرى، وإن المشاكل المالية اللي بدأنا نسمع عنها من جديد تنتهي. أعتقد ده خبر جيد بالنسبة للزمالكاوية، والحقيقة خبر جيد للطرفين”.
واستكمل: “يعني إيه للطرفين؟ أيوه، للطرفين: للزمالك وأعضائه، وأيضًا للمسؤولين. طب الزمالك وأعضاؤه، ما إنت كده يا كابتن هتزنقهم! لا، ما هو كمان عشان الأعضاء يعرفوا المبنى ده هيتفتح إمتى. ما أنا بقالي سنين عمال أسمع عن المبنى ده، فلازم يتحط له جدول زمني للافتتاح”.
واختتم: “وده شيء ممتاز جدًا، وما فيش حاجة تزعل. كل واحد ياخد حقه: نادي الزمالك ياخد حقه، والدولة تاخد حقها. ده أمر ما يزعلش حد في حاجة”.
