هاجم الإعلامي مهيب عبد الهادي لاعبي الأهلي وإدارة النادي بسبب تراجع نتائج الفريق، مؤكدًا أن ما يحدث داخل القلعة الحمراء لا يليق بتاريخها، وأن التركيز على العقود والمكاسب المالية طغى على روح الفانلة الحمراء.
وقال مهيب عبدالهادي عبر برنامج اللعيب على قناة ام بي سي مصر: “لا صوت يعلو فوق صوت اللي بيحصل في الأهلي .. سبحان مغير الاحوال من حال إلى حال من فلوس بالمليارات ومشاركة في كأس العالم وإعلانات ولعيبه اسماء كبيرة جدا والناس كلها قالت الأهلي هياكل الاخضر واليابس .. بيحصل حاجات حاليا كلها غلط ومش مظبوطة”.
وتابع: “كل اللي بيحصل ده بسبب حاجات قديمة لم تنتبه إليها إدارة الأهلي .. عملت حاجات كتيره كويسه لكن في حاجات كانت غلط زي المدير الفني وفي حاجات مكنشي فيها حسم”.
وأضاف: “اللي بيحصل في الأهلي صعب على جماهيره .. لما تيجي بالاسكواد ده تاخد 6 نقاط من أصل 15 نقطة ده صعب جدا ده الأهلي متساوي مع الجونه وفرق لسه صاعدة”.
وأردف: “لعيبه الأهلي قعدت مع بعض في الكواليس وللاسف شايفه الموضوع عادي وبتقولك عادي الفرق بينا وبين الزمالك كام هنجييهم وعندنا ماتش معاهم .. ده خبر من الكواليس.. لكن أنا بقول ده مش الأهلي”.
واستكمل: “بقول للعيبه الأهلي مفروض تحمدوا ربنا انكم بتلعبوا في الأهلي وتسجد شكر انك بتلعب في الأهلي.. لكن تقعد تتكلم في عقود وتقولي اجدد عقدي بكام وبتاع على ايه.. هو انت كنت بتاخد كام يعني وهي فين النتائج اللي حققتها .. انتوا في حاجه غلط، صفوا النية والعبوا كورة مش كل حاجه فلوس.. الأهلي بيدي فلوسه أول بأول وببلتزم بعقوده”.
واختتم: “لا ده كده تحية للاعبي الزمالك اللي بيلعبوا ويأدوا ويكسبوا وهما مخدوش فلوسهم.. الأهلي مش عايز اقول انه دلع لعيبته بس هو وفر ليهم كل حاجه ومفيش مردود للحاجات اللي اتوفرت”.
