إبراهيم عبد الجواد يفتح النار: “الزمالك غارق في الفوضى.. وبيان جون إدوارد مشهد عبثي!” فيديو

شن الإعلامي إبراهيم عبد الجواد هجومًا حادًا على الأوضاع داخل نادي الزمالك، مؤكدًا أن ما يحدث داخل القلعة البيضاء يفتقد لأبسط قواعد الانضباط الإداري والفني.

وقال عبد الجواد عبر إذاعة راديو 90.90: “بصراحة اللي بيحصل في الزمالك عك مش طبيعي، النادي في ظروف صعبة وكل الناس عارفة كده، لكن في أمور إدارية داخلية لازم تكون في إيد المسؤولين، مش كل حاجة نرجعها للظروف.”

وتابع منتقدًا البيان الأخير الصادر عن مدير الكرة بالنادي: “إيه مدير رياضي يطلع بيان من نفسه؟! أنا عمري ما شوفت حاجة كده، هل ممكن مثلاً كابتن محمد يوسف في الأهلي يطلع بيان لوحده؟ مستحيل. فيه ضوابط إدارية لازم تتراعى.”

وأضاف: “ماينفعش مدير رياضي يخاطب الجماهير، ده دور النادي ومجلس الإدارة، مش الأفراد. اللي حصل ده مشهد عبثي لا يليق بنادي بحجم الزمالك.”

وانتقد عبد الجواد أيضًا سوء القرارات الفنية في الفريق: “هل في العالم في مدير فني يلعب سيف جعفر ارتكاز؟! اللاعب مش عارف يثبت نفسه في مركزه الأصلي أساسًا، وده مش خطأ مادي ولا ليه علاقة بالأرض، دي مشكلة فنية بحتة.”

وواصل الإعلامي هجومه على سياسة التعاقدات: “الزمالك ما عندوش فلوس ولا دولارات، ومع ذلك راح جاب محترفين كلهم كسر – باستثناء إخوان – وده زاد الطين بلة. بدل ما نحل الأزمة، زودناها عشر مرات.”

كما انتقد تعامل المدير الفني مع الجماهير: “ماينفعش تعاند جمهورك يا فريرا، الجمهور ده هو اللي شايل النادي على كتفه، هو اللي واقف في ضهر الفريق في أسوأ الظروف. شيل الجمهور من الزمالك، النادي ما يبقاش له قيمة.”

وعن قضية اللاعب محمد السيد، قال عبد الجواد: “اللاعب لسه اسمه مكتوب بالقلم الرصاص، ماعملش حاجة للزمالك، وبيماطل في التجديد وبيتكلم عن الاحتراف! طبيعي الجمهور يبقى زعلان منه.”

وختم تصريحاته مؤكدًا: “جمهور الزمالك مش جمهور سهل، ذكي جدًا، وبيفهم كل حاجة. ماينفعش تضحك عليه بكلمتين حلوين. هو اللي وقف وساند النادي لما كان بيغرق، وهو اللي خلى الفريق ياخد كأس مصر السنة اللي فاتت.”