بعد الكارثة الجديدة.. شوبير يصرخ في وجه إدارة الزمالك: “دخلتوا الجماهير في مشاكلكم ومش عايزين مبررات”! فيديو
كشف الإعلامي أحمد شوبير عن أزمة جديدة تهدد نادي الزمالك، مشيرًا إلى أن النادي يواجه ملفات مالية خطيرة قد تضعه في مأزق كبير خلال الفترة القادمة، موجّهًا في الوقت نفسه رسالة حادة إلى مجلس الإدارة بضرورة التحرك السريع قبل تفاقم الأوضاع.
وقال شوبير في برنامجه الإذاعي: “بصوا يا جماعة، لو اللاعبين ما اشتكوش، وده مؤكد على لسان مصدر مسؤول في نادي الزمالك، فالمؤكد إن نادي إستريلا البرتغالي هو اللي اشتكى الزمالك في الفيفا، بيقولوا ماخدوش مستحقاتهم المالية من صفقة بيع الأنجولي شيكو بانزا.”
وأضاف: “المسؤول الإعلامي في النادي البرتغالي قال إن الزمالك اتأخر في دفع الفلوس، وكمان محدش بيرد عليهم، وإن لسه لحد دلوقتي الفيفا ماخدش إجراء قانوني، بس في أي وقت ممكن الموضوع يبقى قضية ويتحول لوجع دماغ جديد، والمبلغ المطلوب حوالي 700 ألف دولار.”
وتابع: “بس المصيبة ما وقفتش هنا، فاكرين لما قلتلكم إن الزمالك سدد فلوس المدرب جوزيه جوميز؟ كنت متأكد من الكلام ده لأن تصريحات رسمية خرجت وقتها، لكن المفاجأة إن جوميز هو كمان اشتكى عشان عنده فلوس متأخرة!”
وأكمل: “جوميز قدّم الشكوى عن طريق المحامي بتاعه، والمبلغ حوالي مليون و200 ألف دولار، مع إن كان في اتفاق بين الطرفين إن الفلوس تتجدول، والزمالك اتأخر، فالمحامي رفع قضية جديدة، وبكده النادي مطالب يسدد فورًا عشان مايتعرضش لإيقاف قيد جديد.”
وقال شوبير بنبرة غضب: “هو إيه يا جماعة اللي بيحصل؟! كل يوم نصحى على أزمة! أصل أرض أكتوبر؟ يا سيدي أرض أكتوبر إيه وأرض مارس إيه! الجمهور اللي بيتحرق ده ماله ومال أرض أكتوبر ولا أرض مايو! الجمهور عايز يشوف فريقه واقف على رجله مش عايز يسمع مبررات!”
وأردف: “إنت خلت جمهور الزمالك يتشتت في حكاية أرض أكتوبر، وبدأت الناس تتكلم في حاجات مالهاش لازمة، مفيش حملة ضدك، بالعكس الدولة عايزة تساعد وتحل الأزمة، فاهدأ وشوف حلول.”
واختتم شوبير كلامه قائلًا: “دور على حلول، واتكلم، وحارب على حقك، بس بلاش تدخل الجمهور ولا اللاعيبة في أزمة أرض أكتوبر، لأنك غلطت من زمان، واللي قبلك غلط أكتر منك، بس لازم تصحى وتشوف حل قبل ما الدنيا تولّع.”
