شنّ الإعلامي أحمد شوبير هجومًا حادًا على الانتقادات التي طالت مدافع الزمالك حسام عبد المجيد، بسبب مصافحته لمدربي الأهلي بعد مباراة القمة الأخيرة، مؤكدًا أن ما يثار حول الواقعة “عبث لا يليق بالرياضة المصرية” ومحاولة واضحة لإشعال الفتنة بين الجماهير.
وقال شوبير في تصريحات عبر برنامجه الإذاعي صباح اليوم الأربعاء: “في الحقيقة حاجة غريبة جدًا إن الناس زعلانة أو البعض زعلان إن حسام عبد المجيد سلم على عادل مصطفى المدرب العام للنادي الأهلي ومحمد بن رمضان بعد الهزيمة”.
وأضاف متعجبً: “نعم، والله العظيم صفحات كتيرة كانت بتقول كان لازم يكون زعلان وما يسلمش عليهم وما يقدمش التهنئة! أصل ده بقى متفق معاهم عشان ينتقل للأهلي، وزيزو واصل مش عارف إيه… إيه ده إيه ده إيه ده؟”.
وواصل: “محمد عواد كان قاعد جنب أفشة فوق، واللاعيبة كانوا بيهزروا مع بعض قبل المباراة وعادي جدًا، يا إخوانا، حرام عليكم اللي بتعملوه في الرياضة في مصر، يا إخوانا اتقوا الله، والله العظيم تلاتة اللي بتعملوه ده لا يليق”.
وأردف: “والناس اللي بتكتب وتنزل الأخبار والصور دي لا تليق. وكفاية البرامج اللي بتولع الدنيا: ده مع ده وده ضد ده… إيه ده؟ مالوش علاقة بالرياضة ولا بالإعلام الرياضي خالص”.
وأشار: “اطلع قول رأيك، اطلع اضحك، اطلع هزر، لكن إيه ده إيه ده إزاي أسلم عليه وإزاي ما أسلمش عليه؟ ده أنا كنت أنزل أسخن وأروح لجمهور الزمالك قبل جمهور الأهلي في الماتشات”.
واختتم: “ده منهم لله بس اللي عملوا ما بينا الوقيعة والقصة والحدوتة في الكام سنة الأخيرة دول وصلونا للمرحلة دي. يا جماعة، مزيد من العقل والهدوء. المبادرات اللي فاتت كانت حلوة… يا رب تكمل على خير”.
