كشف الإعلامي أحمد شوبير، خلال برنامجه الإذاعي، تفاصيل جديدة عن ما تردد في الساعات الأخيرة بخصوص وجود شرط جزائي كبير في عقد المدير الرياضي لنادي الزمالك، جون إدوارد، مؤكدًا إن الكلام المنتشر مش دقيق بالشكل اللي الناس فاكرينه.
وقال شوبير: “الناس الفترة اللي فاتت اتكلمت عن حاجة اسمها الشرط الجزائري، بس الحقيقة إن الصيغة التعاقدية بين الزمالك وجون إدوارد فيها بنود بتنظم العلاقة وبتحافظ على الانضباط، لكن مفيش شرط جزائي بالمبلغ اللي اتقال، والشرط الموجود فعليًا أقل من كده بكتير.”
وأضاف: “جون إدوارد بيحترم الزمالك جدًا وجماهيره، والعلاقة بينه وبين النادي مبنية على الاحترام، ولو حصل إن التجربة دي انتهت في أي وقت، هيكون بالاتفاق والتراضي، مش عن طريق تفعيل بنود جزائية ولا أي حاجة من دي.”
وتابع شوبير: “حاليًا مفيش أي كلام جوه النادي عن إنهاء التجربة، بالعكس الكل بيدعم المدير الرياضي علشان النادي يقدر يعدي الأزمة المالية اللي بيمر بيها. وجود شرط جزائي مش معناه إن الكلام اللي اتقال كله غلط، بالعكس ممكن الزميل اللي نشر الخبر جاب جزء كبير من الحقيقة، حتى لو الرقم مش مضبوط.”
وأردف: “جون إدوارد امبارح طلع بيان عاطفي جدًا، بس جمهور الزمالك مش عايز بيانات، هو عايز يشوف الفريق بيكسب وبيحقق نتائج كويسة على أرض الملعب.”
واختتم شوبير حديثه قائلًا: “رغم الظروف الصعبة اللي بيمر بيها النادي، الزمالك قدر ياخد السوبر الإفريقي وكأس مصر من بيراميدز، والفريق عنده مجموعة لاعيبة قوية في كل المراكز، سواء في الهجوم أو الوسط أو الدفاع أو حتى حراسة المرمى. الزمالك عنده فرقة محترمة وقادرة تحقق بطولات وتسعد جمهوره.”
