“حيرة.. دوشة.. أزمة مالية”.. شوبير يكشف كواليس الفوضى داخل الزمالك ومصير المدرب والبديل! فيديو
علّق الإعلامي أحمد شوبير على حالة التخبط التي يمر بها نادي الزمالك خلال الفترة الأخيرة، مؤكدًا أن إدارة النادي تواجه أزمة حقيقية في حسم مصير المدير الفني البلجيكي يانيك فيريرا.
وقال شوبير في تصريحاته الإذاعية صباح اليوم الأحد: “الزمالك في حيرة يا عيني، إدارة النادي مش عارفة تعمل إيه! طب نمشي فيريرا؟ ماشي، طب هنديله الشرط الجزائي؟ ولا هو كمان هيترحل زي اللي قبل كده؟ وبعد كده نسمع عن قرارات وإيقاف قيد وشغلانة وحدوتة ودوشة! يعني العملية صعبة جدًا، صعبة أوي”.
وأضاف موضحًا: “الناس كلها محتارة، طيب خلاص نجيب مدرب مصري؟ طب مين؟ أنا قلت قبل كده، المصريين اللي ممكن يتكلم فيهم الزمالك مش كتير. مؤمن سليمان مرتبط بالشرطة العراقي، وطارق مصطفى مرتبط بأهلي بنغازي، وخالد جلال فاضي. بس السؤال: مين فيهم عنده القوة والشخصية اللي تتحمل ضغط الزمالك؟”.
وتابع شوبير قائلًا: “هل ممكن ميدو يرجع تاني؟ هل الزمالك يكرر التجربة دي؟ وارد جدًا، كل حاجة ممكنة. بس المشكلة إنهم نفسهم في النادي مش عارفين يعملوا إيه. كانوا مستنيين نتيجة مباراة المحلة وقالوا يا رب الماتش يعدي على خير، وبعدها نشوف إيه اللي ممكن يحصل”.
وأردف: “هو فعلاً الوضع صعب، الفلوس فيها أزمة. يعني لو مشينا الراجل، هنديله فلوسه إزاي؟ ولو جبنا مدرب أجنبي تاني، ده كمان محتاج تجهيزات مالية ومصاريف جديدة. طب والدنيا شكلها إزاي؟ يعني القرار مش بسيط خالص، ولازم يتدرس كويس جدًا”.
واستطرد شوبير قائلًا: “أنا مش جاي أقولك مين المدرب اللي المفروض ييجي، بس لازم تدرس وتظبط الدنيا. لأن الزمالك مش ناقص كوارث جديدة. لازم يكون في تفكير، مش قرارات متسرعة. لأن أي خطوة غلط دلوقتي ممكن تكلف النادي كتير جدًا”.
واختتم شوبير حديثه مؤكدًا: “أنا نصيحتي لإدارة الزمالك، قبل ما تاخدوا أي قرار، فكروا كويس. النادي محتاج استقرار، مش تجارب جديدة كل شهر. الاستقرار الفني والإداري هو الحل الوحيد علشان الزمالك يرجع يقف على رجله تاني”.
