طارق السيد يفتح النار بعد تعثر الزمالك امام البنك الاهلي ورد قوي بشأن رحيل يانيك فيريرا

هاجم الكابتن طارق السيد نجم نادي الزمالك السابق إدارة النادي بسبب استمرار المدير الفني البلجيكي يانيك فيريرا رغم تراجع نتائج الفريق في بطولة الدوري المصري الممتاز.

وقال طارق السيد خلال ظهوره ببرنامج اللعيب مع الإعلامي مهيب عبدالهادي على قناة MBC مصر: “مهيب قال حاجة في الانترو مهمة جدًا، الزمالك عنده مشكلة بسبب المدير الفني، ميفعش يكون عندي مدرب أربع مباريات في الدوري يخسر 9 نقاط من 12 وأفضل مصر عليه!”.

وأضاف: “النادي الأهلي هنا أحييه، سواء جمهوره أو إدارته، ريبيرو لما مسك الأهلي ولعب حوالي 8 ماتشات ولما لقوه مش على قد مستوى النادي الأهلي مشي فورًا، أما إحنا في الزمالك بنفضل نكابر”.

وتابع: “ومتجيش تقولي مفيش فلوس، السنة اللي فاتت مشيت جوميز وجبت جروس، وبعدها بشهر مشيت جروس وجبت بسيرو، وبعد شهرين مشيت بسيرو وجبت أيمن الرمادي، وكل ده وانت بتقول مفيش فلوس! يعني دي مش مشكلة مالية، دي مشكلة تفكير”.

وفي رده على مهيب عبدالهادي الذي طالبه بالهدوء، قال طارق السيد بانفعال: “أنا صعبان عليا جمهور الزمالك، باستثناء ماتش الأهلي اللي خارج الحسابات، لو كسبت الثلاث أو الأربع مباريات التانية كنت دلوقتي عندك 28 نقطة، فارقك عن الأول 5 أو 6 نقاط بس، لكن انت اللي بتضيع المنافسة بنفسك”.

واختتم تصريحاته قائلاً: “الناس كلها شايفة إن الراجل مش كويس، والزمالك بيقع وبيعمل نتائج سلبية، ومع ذلك مفيش قرار.. دي مشكلة دماغ مش مشكلة فلوس”.