كشف الإعلامي أحمد شوبير، خلال برنامجه الإذاعي صباح اليوم الإثنين، حقيقة ما تردد بشأن أزمة جديدة داخل نادي الزمالك، تتعلق بنيّة بعض اللاعبين الأجانب تقديم شكاوى لفسخ عقودهم بسبب تأخر المستحقات، مؤكدًا أن ما تم تداوله غير دقيق وأن الحقيقة مختلفة تمامًا.
وقال شوبير: “أنا هقول لكم اللي فيه إشاعة واللي فيه حقيقة عشان الصورة تبقى واضحة. فيه كلام كتير طالع عن لعيبة الزمالك الأجانب، وإن بعضهم عنده نية يقدم شكوى عشان يفسخ عقده بسبب إنهم ما أخدوش مستحقاتهم المتأخرة.”
وتابع: “أنا سألت جوه نادي الزمالك، وقالولي الكلام ده مش صحيح خالص. أكتر من مصدر مسؤول في النادي أكدلي كده، وقال إن محدش من اللعيبة قدم إخطار أو شكوى، وإن المستحقات اتدفعت فعلاً.”
وأضاف: “الأستاذ هشام نصر، نائب رئيس النادي، قال إن الزمالك دفع من 20 لـ25 مليون جنيه كسلفة، ووزعوها على اللعيبة كلها سواء أجانب أو محليين، بنسبة من المبالغ اللي ليهم. وقال كمان إن النادي هيحاول يوفر جزء تاني قريب، ومفيش أزمة في العقود زي ما بيتقال.”
وأشار شوبير: “ببساطة كده، الكلام ده غلط ومش مظبوط، بس لو الأزمة المالية استمرت والنادي ما دفعش المستحقات كاملة، خصوصًا للأجانب، ساعتها الموقف هيختلف، لأن اللعيبة دي ما جتش تلعب ببلاش. محدش فيهم جاي عشان (سواد عيوننا)، كلهم جايين من بلادهم عشان الشغل والمقابل المادي.”
وشدد: “لعيبة زي شيكو بانزا وإخوان بيزيرا ما اتولدوش في الزمالك، دول محترفين جايين يكملوا مسيرتهم. لو ما أخدوش فلوسهم، طبيعي هيقدموا شكوى، والنهارده الفيفا إيده بقت قوية، والزمالك لازم يلاقي حل قبل ما الأمور تكبر.”
وأردف قائلًا: “مش كل مرة لما نتكلم نسمع كلمة (أرض أكتوبر)! اللعيبة مالهاش دعوة بالأراضي والمشاريع، اللي يهمهم فلوسهم. والأغرب إن النادي مش عارف بيخصم منين حسب اللوايح! يعني إزاي تخصم من شيكو بانزا وهو أصلاً ما أخدش فلوسه؟ الكلام ده مش منطقي خالص.”
واختتم شوبير كلامه قائلًا: “فيه كمان أخبار بتقول إن النادي بيحاول يوفّر مرتب الجهاز الفني، وده طبعًا حقهم، وواجب على النادي يدفعه. ده كل اللي عندي في الموضوع، وقلت أوضح الصورة كاملة عشان الناس تبقى فاهمة الحقيقة.”
