انتقد الإعلامي مهيب عبد الهادي ما وصفه بـ”العشوائية” في إدارة أزمة مشاركة دونجا في مباراة السوبر المصري، مؤكدًا أن ما حدث يفتقد لأبسط قواعد التنظيم والوضوح بين اتحاد الكرة ونادي الزمالك.
وقال مهيب عبد الهادي في تصريحات تلفزيونية: “طبعًا كلنا شفنا اللي حصل اليومين اللي فاتوا.. دونجا هيلعب السوبر المصري ولا لا؟ طيب إيه الموقف؟ كل ساعة بحال! وصلنا لدرجة إننا مش عارفين إذا كان في لاعب موجود في نادٍ كبير هيلعب ولا مش هيلعب.”
وأضاف: “قمة العشوائية والله العظيم، يعني ماجستير اللي بيحصل ده، دكتوراه! حاجة كده يعني، قول زي ما انت عايز تقول.”
وتابع: “والمشكلة يا جماعة إن المظلوم هي الجماهير، الجماهير اللي مظلومة بيتلعب بيها، اللعيب بتاعي مش هيلعب ليه؟ ما في عقوبة! طب فين؟ طب ما اتبعتش الورق ليه؟!”
وأوضح: “اتحاد الكرة في الأول يقول لك: ما عنديش أي تفسير أو ما عنديش إيه؟ ما عنديش يعني، ما عنديش حاجة أقولها. إحنا بعتنا خلاص، وقعدوا يدوروا ومش لاقيين. طب إيه القصة بقى؟”
وتابع عبد الهادي حديثه قائلاً: “أنا أقول لكم القصة باختصار وبهدوء. القصة إنّي حتى لسه مكلم كابتن عبد الواحد السيد، قلت له: إيه القصة يا كابتن عبد الواحد؟ قال لي: ما فيش، اليوم اللي إحنا رجعنا فيه مصر، اليوم اللي عبد الواحد رجع فيه مع شلبي ومع دونجا، رجعوا مصر، اتبعت إيميل على أحمد إبراهيم. مين أحمد إبراهيم؟ ده مدير شؤون اللاعبين، ده الإيميل المعتمد في الزمالك.”
وأكمل: “يعني نادي الزمالك قال لاتحاد الكرة: لو عايزين تبعتوا لي، ابعتوا لي على إيميل الراجل ده، لأنه مدير شؤون اللاعبين، وعلى الفيفا كمان يبقى أحمد إبراهيم هو اللي بيستقبل. ممكن اتحاد الكرة يبعت على الزمالك أو يبعت على إيميل الكابتن حسين لبيب، لكن إيميل أحمد إبراهيم هو الإيميل المعتمد لدى اتحاد الكرة.”
وختم مهيب عبد الهادي تصريحاته قائلًا: “طيب اتحاد الكرة عمل إيه بقى؟ بعت إيميل لأحمد إبراهيم في اليوم اللي راجع فيه دونجا وشلبي وعبد الواحد بإيقاف الثلاثي. يبقى اتحاد الكرة بعت؟ آه. معتمد؟ آه. الزمالك استقبل؟ آه. طيب ما اتبعتش بقى على نادي الزمالك، وما اتبعتش على حسين لبيب، وما اتبعتش الكلام ده صادر ووارد. الكلام ده اتبعت إيميل وخلاص، ونامت الأمور على كده.”
