تحدّث الكابتن حمادة أنور، عضو مجلس إدارة نادي الزمالك السابق، عن أزمة إيقاف اللاعب دونجا وما دار من تفاصيل حول الإيميلات والمخاطبات الرسمية داخل النادي، وذلك خلال ظهوره في برنامج “اللعيب” مع الإعلامي مهيب عبد الهادي عبر قناة MBC مصر.
وقال حمادة أنور: “اللي حصل في نادي الزمالك عيب جدًا، وأنا شفت المكالمة اللي كانت بينك وبين عمرو أبو العز، وما ينفعش ده يحصل في نادٍ كبير زي الزمالك.”
وأضاف: “إن يبقى عندي الإيميل اللي بيجي عليه الإيميلات الخاصة بالنادي ويكون إيميل شخصي؟ دي طبعًا عمرها ما تنفع تكون موجودة في أي نادي محترف.”
وتابع: “أحمد إبراهيم من الناس المجتهدة والكويسة جدًا، وطالما الإيميل بتاعي حتى لو مش معتمد في الفيفا، لكنه موجود في الـTMS، يبقى هو المعتمد في التعامل، وأي إيميل موجود على الـTMS بتتعامل بيه رسميًا.”
وأوضح أنور: “الطبيعي لما ييجي إيميل بإيقاف لاعب، لازم أطبع الإيميل وأسلّمه لمدير الكرة، وكان وقتها الكابتن عبد الواحد السيد، لكن ده ما حصلش، والمفروض كنت أرفع مذكرة لمجلس الإدارة إن عمارة ودويدار موقوفين، والمجلس يتصرف.”
وأشار إلى أنه من الطبيعي أن يتم طباعة الإيميل ووضعه في السجلات الرسمية بالنادي، قائلاً: “لازم يكون عندي نظام صادر ووارد، علشان لو حمادة مشي وجه بعده عمارة يبقى كل حاجة موثقة، مش كل شوية أسأل مين موقوف ومين لا، ده نادي كبير لازم تكون عنده قاعدة بيانات كاملة.”
ومن جانبه، قال الإعلامي مهيب عبد الهادي: “عبد الناصر محمد لما واجه نفس الموقف بعت لاتحاد الكرة وطلب إفادة عن اللاعبين الموقوفين، وده التصرف الصح.”
ورد حمادة أنور مؤكدًا: “كلامك مظبوط، وده الصح اللي عمله الكابتن عبد الناصر، وأنا كمان في بداية كل بطولة ببعت لاتحاد الكرة أطلب كشف الموقوفين عندي.”
وسأل مهيب عن أزمة الإيميلات داخل اتحاد الكرة قائلاً: “اتحاد الكرة نفسه عنده مشكلة، لأنه غيّر الإيميل لما جه مجلس هاني أبوريدة بعد جمال علام، والمدير التنفيذي وقتها قفل الإيميل القديم وعمل جديد.”
ليعلق حمادة أنور موضحًا: “فعلاً الإيميل اتغير، لكن حتى اللي اتبعت من الإيميل القديم ما وصلش ورقي للناس، ولما تيجي تبص في سكرتارية الزمالك مش هتلاقي أي مكاتبات ورقية.”
وأضاف: “الاتنين غلط، النادي والاتحاد، بس أنا بتكلم من ناحية النظام الإداري داخل الزمالك، المفروض لما يوصل إيميل أطبعه وأعمل مذكرة وأعرضها على مجلس الإدارة، ده الطبيعي.”
وتابع: “دي مش غلطة الكابتن عبد الناصر، أنا بتكلم عن اللي قبل كده، لأن لازم يكون فيه رولز ونظام واضح، وحتى لو الإيميل شخصي رسمي، المفروض أطبعه وأوثقه.”
واختتم حمادة أنور تصريحاته قائلًا: “إنت مشيت، أنا جيت بعدك، المفروض ألاقي مرجعية ومكاتبات رسمية، مش أضطر أتصل بيك أسألك. إحنا بنتعامل مع كيان مش مع أشخاص.”
