أسرار صادمة من ميدو وفاروق جعفر.. رسائل وصلت “للدولة” تفضح ما جرى داخل الزمالك وسبب انسحابه من المشهد
شهدت قناة النهار حوارًا ناريًا بين الثنائي فاروق جعفر وأحمد حسام “ميدو”، كشفا خلاله كواليس مثيرة عن فترة عمل ميدو داخل نادي الزمالك، والضغوط التي واجهها من داخل النادي نفسه.
بدأ فاروق جعفر حديثه قائلاً لميدو: “أنا كنت معاك في الاستوديو وقلتلك يا ميدو أنا عايزك تعمل كذا، وأنت وقتها قولتلي ازاي يا كابتن؟ أنت كنت مش عايز تدخل في الموضوع ده.”
ورد أحمد حسام ميدو مؤكدًا أن الكابتن فاروق جعفر كان بالفعل يريد تعيينه مديرًا فنيًا للزمالك في وقت سابق، لكنه رفض لأن التوقيت لم يكن مناسبًا إطلاقًا، قائلاً: “كنت حاطط نفسي في وش المدفع على خط النار زي ما بيقولوا، لكن للأسف في أول مواجهة حقيقية مسؤولي الزمالك بيرجعوا وراك ويسبوك لوحدك.”
وكشف ميدو لأول مرة عن كواليس انسحابه من الزمالك، موضحًا أنه خرج في أحد البرامج وتحدث بجرأة عن مسؤولين داخل النادي تسببوا في قرارات أهدت الأهلي بطولة الدوري، مؤكدًا أنه مقتنع بما قاله ومستعد لتكراره مليون مرة دفاعًا عن الزمالك.
وأضاف ميدو في تصريح صادم: “بعدها بيومين اكتشفت أن أحد كبار مسؤولي الزمالك بعت الفيديو ده لمسؤولين كبار في الدولة، ومعاه جملة بتقول إحنا ملناش دعوة بميدو.. والله العظيم ده حصل وحياة أولادي.”
وتابع قائلاً: “أنا عرفت الشخص ده كويس، وبعدها قلت لنفسي أنا إيه اللي بعمله في نفسي؟ إزاي الناس دي تعمل كده في البني آدم اللي بيحارب علشانهم؟”
واختتم ميدو حديثه مؤكدًا أنه رغم كل ما حدث سيظل داعمًا للزمالك ولن يتخلى عن النادي الذي ينتمي إليه، قائلاً: “في ولاد صغيرة بتتفرج علينا، لما تشوف اللي بيحصل ده إزاي هيتعلموا الولاء والانتماء؟ كل حاجة ليها تمن.”
