أشاد الإعلامي مهيب عبد الهادي بأداء فريق بتروجيت أمام الأهلي، موجهًا التحية للجهاز الفني بقيادة سيد عيد، بعد التعادل المثير الذي حققه الفريق في الدوري المصري، كما تحدث مع محمد أيمن، المشرف العام على الكرة بالنادي، عن مستقبل اللاعب حامد حمدان وإمكانية انتقاله إلى الزمالك خلال الفترة المقبلة.
وقال مهيب عبد الهادي خلال برنامج “اللعيب” على قناة MBC مصر: “مش عارف أقول لك مبروك على النقطة ولا هارد لك؟”، ليرد عليه محمد أيمن قائلًا: “الحمد لله على النقطة، أمام النادي الأهلي النقطة دي طعمها طعم الثلاث نقاط. راضين عن الأداء والنتيجة، وبشكر اللاعبين والجهاز الفني وكابتن سيد عيد على الأداء الرجولي والقتالي في المباراة.”
وتابع مهيب: “بحيي كابتن سيد عيد، عاملين تيم محترم مش مفاجأة إنكم تتعادلوا، لكن المفاجأة إن الأداء قلّ بعد هدف حامد حمدان.”
وردّ محمد أيمن: “ده طبيعي جدًا، لما تسجل هدف أمام الأهلي الضغط الهجومي بيزيد عليك، والفريق بيتحول دفاعيًا. ورغم إن هدف دخل فينا، لكن في الدقائق الأخيرة كان ممكن نحقق الفوز لأننا ضيّعنا فرص مهمة.”
وسأل مهيب عبد الهادي المشرف العام عن مصير انتقال حامد حمدان إلى الزمالك، ليقول ممازحًا: “أنا كنت لسه بقول ما تسيبوش الراجل، بجد لعيب محترم وعايز يحقق حلمه.”
وأجاب محمد أيمن: “أكيد، وعايز أوضح إن حسابات نادي بتروجيت عمرها ما بتتأثر بأي انتماءات أو ضغوط من أندية تانية. إحنا بنبص لرغبة اللاعب في المقام الأول، لأن رغبته الشخصية أهم حاجة في أي انتقال، لكن لازم كمان الحقوق كلها تتظبط: حقوق النادي، والفريق، والجهاز الفني، واللاعب نفسه.”
وأضاف: “الموضوع ما فيهوش أي تعنت، ولا إجبار إن اللاعب يفضل أو يمشي في وقت معين. بالعكس، الأمور ماشية بشكل احترافي جدًا.”
وكشف محمد أيمن: “في اتفاق مبدئي بين بتروجيت ونادي الزمالك على انتقال حامد حمدان خلال شهر يناير المقبل، لكن ممكن تحصل بعض التعديلات في آلية تنفيذ الصفقة. لسه ما تمش أي خطوات رسمية حتى الآن، لكن الموضوع مفتوح خلال الفترة الجاية.”
وأوضح: “اللاعب كان ليه موقف معين واعتذر، وهو بيؤدي دلوقتي بروح عالية جدًا. حتى لو هيمشي، لازم يخرج من الباب الكبير، وده اللي بيعمله حاليًا بأدائه والتزامه.”
واختتم مهيب عبد الهادي حديثه قائلاً: “بحيي حامد حمدان بصراحة، لاعب عنده جرينتا وشخصية كبيرة، ويستحق التواجد في نادي الزمالك.”
