قال الإعلامي أحمد شوبير إن الصورة ما زالت غير واضحة بخصوص المدير الفني الجديد للنادي الأهلي، مؤكدًا إن الإدارة لسه بتدرس أكتر من اسم وبتجري مفاوضات مع مدربين من مدارس مختلفة علشان تختار الأنسب للفريق في المرحلة الجاية.
وقال شوبير في تصريحات عبر برنامجه الإذاعي صباح اليوم الاثنين: “لا جديد حتى الآن في موضوع مدرب النادي الأهلي، فيه كلام ومفاوضات وحوارات، وتسمع عن مدربين من كل الجنسيات: بولندي، هولندي، صيني، ألماني، ياباني… يعني هتسمع كل لغات العالم. الأهلي بيتفاوض مع أكتر من مدرب، بس لسه مفيش اتفاق حتى اللحظة دي.”
وأضاف: “من الوارد جدًا جدًا إن يتم تأجيل حسم الملف ده لما بعد فترة التوقف الدولي في نوفمبر اللي جاي بإذن الله.”
وعن الأسماء اللي الناس بتتكلم عنها، قال شوبير: “فاتح تريم الأرقام بعيدة جدًا بينه وبين الأهلي. الراجل طلب رقم كبير، حوالي 6 مليون دولار، ومعاه كمان مساعده حمزة أوغلو، فالموضوع كده صعب شوية.”
وتابع: “كارلوس كيروش عنده التزامات مع منتخب سلطنة عمان في تصفيات كأس العالم، ومش هيكلم حد إلا لما يخلص المرحلة دي. أما روي فيتوريا، الراجل قال إنه محتاج يريح شوية بعد الشغل اللي كان فيه، ومش عايز يدخل تجربة جديدة دلوقتي.”
واستكمل كلامه قائلًا: “أما المدرب البولندي تشيسلاف ميشنيفيتش، فده برّه الصورة خالص، مفيش أي كلام معاه.”
واختتم شوبير حديثه قائلًا: “أنا بحاول أجيبلكم الأخبار على قد ما أقدر، لكن لحد دلوقتي الأهلي ما وصلش لاتفاق نهائي مع أي مدرب، والمفاوضات لسه شغالة لاختيار الأنسب للفريق في الفترة الجاية.”
