قال الكابتن إكرامي الشحات، حارس مرمى الأهلي السابق، إن لديه اقتراحًا يمكن أن يساهم في حل الأزمة المالية التي يمر بها نادي الزمالك خلال فترة قصيرة، مشيرًا إلى أن الاعتماد على دعم الجماهير قد يكون هو الحل الواقعي في ظل غياب مساهمة رجال الأعمال.
وأوضح إكرامي، خلال تصريحات لقناة «MBC مصر»: “بيتقال إن نادي الزمالك عنده 50 مليون مشجع، وكل الإخوة الزملكاوية والإعلام الزملكاوي بيأكدوا إنهم أكتر من 50 مليون، ماشي هنقول 50. أنا عندي رأي في الموضوع ده، وممكن الزمالك يخرج من أزمته المالية في خلال 3 أو 4 شهور.
وأشار: “لو كل واحد من الـ50 مليون يتبرع بـ2 جنيه في الشهر، يبقى النادي هيخش له 100 مليون جنيه شهريًا.”
وأضاف: “إذا كان رجال الأعمال تخلّوا عن نادي الزمالك، واللي المفروض إنهم بيدعموه، وفي ناس بتتكلم كتير من غير ما تعمل حاجة، فمش عيب إن جمهور الزمالك يقف جنب ناديه. لو كل واحد دفع 2 جنيه في الشهر، يبقى 100 مليون. في خمس شهور يبقوا نص مليار، والنادي يخرج من أزمته. ده اقتراح أنا فكرت فيه، وده الحل الوحيد دلوقتي، لأن مافيش حد هيديله نص مليار، ولا في حد يقدر يدي نادي الزمالك 100 مليون كل شهر.”
وتابع قائلاً: “حتى لو العدد أقل، يعني بدل 50 مليون بقوا 30 مثلاً، هيبقى عندك 60 مليون جنيه في الشهر، يعني 300 مليون في خمس شهور.
وأكد: “وأنا بقولها بوضوح: لو الأهلي في نفس الموقف، هقول كده برضه. أيام أزمة كورونا، لما كانت في أزمة مالية في الأهلي، إحنا كمدربين وعاملين تبرعنا بجزء من مرتباتنا كل شهر، ومكانش عيب.”
واختتم إكرامي حديثه مؤكدًا: “مش عيب إن جمهور الزمالك النهارده يقف مع ناديه. هتقولوا تسوّل؟ لا، مافيش تسوّل. أنا بقول الاقتراح ده عن قناعة، مش استهزاء. ولو الأهلي في نفس الموقف، هقول نفس الكلام. بس هتلاقي جمهور الأهلي مش بيدفع 2 جنيه، كل واحد هيدفع 10 أو 20 جنيه في الشهر. طب ليه جمهور الزمالك ما يعملش كده؟ عيب في إيه؟ مش عيب.”
