كشف الإعلامي أحمد شوبير عن تفاصيل جديدة تخص ملف المدير الفني الأجنبي المنتظر للنادي الأهلي، وأكد إن الإدارة بتتعامل مع الملف بهدوء وبدون أي تسرّع، رغم إن في مفاوضات جارية مع أكتر من اسم على رأسهم المدرب السويدي هنريك ريدستروم.
وقال شوبير في تصريحات عبر برنامجه الإذاعي: “”بص يا جماعة، أنا بقول لكم اللي اتكتب، مش من عندي. هنريك ريدستروم طلع في صحيفة سويدية وقال إن الأهلي نادي عملاق، وإن في أسماء كتير مطروحة لتدريب الفريق. ولما سألوه عن تدريب الأهلي قال: النادي عملاق، ومش قادر أقول أكتر من كده”.
وتابع: “الراجل ساب تدريب مالمو السويدي، وقال إنه بيحترم الجماهير، بس إدارات الأندية ما ينفعش تمشي ورا رغبات الجمهور في قراراتها. ومع كده، هو فخور جدًا باللي عمله مع مالمو، قال إنه كسب الدوري مرتين، ووصل نهائي الكاس مرتين، كسب واحدة منهم، وكسب في الدوري الأوروبي مرتين، وكمان الثنائية اللي عملها السنة اللي فاتت كانت أول مرة تحصل لمالمو من ٣٨ سنة”.
وأشار: “وبعدين قال إنه بيحب الدوري السويدي جدًا، بس بعد ما كسب كل الألقاب هناك كلاعب ومدرب، ممكن يدور على دوري تاني يكون فيه تحدي أكتر بالنسباله”.
واستكمل: “في مصدر داخل الأهلي قال لي إن ريدستروم من ضمن المرشحين. والناس كلها بتسألني عن المدرب، وأنا بقولها لكم بكل وضوح: الأهلي هيجيب مدرب أجنبي، هيجيب مدرب أجنبي، قولا واحدًا. في مفاوضات وفي اتصالات، بس هم بياخدوا الموضوع بهدوء”.
وأوضح: “عماد النحاس دلوقتي لعب خمس ماتشات، جاب منهم ١٥ نقطة، والأهلي بقى في المركز الأول بعد ما كان في المركز الـ١٦. يعني الراجل عمل شغل كويس جدًا، فمفيش داعي للاستعجال. النادي بيشتغل بهدوء وبيفكر صح”.
وأضاف: “سألت أحد المصادر في الأهلي، قلت له المدرب هييجي في التوقف الجاي؟ قال لي لأ، مين قال كده؟ قلت له طب ما أنت اللي قلت إنكم مش مستعجلين. قال لي لأ، مش مستعجلين، بس لو لقينا مدرب كويس مش هنستنى”.
وأردف: “دلوقتي الناس بتتكلم كتير، في اللي بيقول مستنيين مدرب، وفي اللي بيقول لأ. وأنا بقولها بوضوح: ما عنديش معلومة نهائية. الأهلي بيتفاوض، لكن مفيش قرار نهائي لحد دلوقتي”.
وواصل: “من كام يوم كده، واحد أنا بثق فيه جدًا كلمني وقال لي: يا كابتن، قول فلان الفلاني هو مدرب الأهلي. قلت له طب ولو طلع غلط؟ قال لي على مسؤوليتي. قلت له طب لو طلع غلط هتطلع تقول إنك اللي قلتلي؟ سكت”.
وأكد: “فمحبتش أقول، وبعدها مصر كلها قالت إن الأهلي متفق مع مدرب دنماركي، وأنا الوحيد اللي ما قلتش. وفي الآخر الناس قالت: طالما شوبير ما قالش، يبقى أكيد المعلومة مش مؤكدة”.
واختتم: “الحمد لله، أنا قلتلكم من الأول: في مدرب دنماركي الأهلي بيتفاوض معاه، بس لسه مفيش حاجة رسمية. الأهلي بيتفاوض، بس مش مستعجل خالص في التعاقد مع المدرب الجديد”.
