أكد الإعلامي مهيب عبد الهادي في تصريحات عبر برنامج «اللعيب» إن النادي الأهلي حسم بالفعل اتفاقه مع المدير الفني الدنماركي جيس ثورب، مشيرًا إلى أن الإعلان الرسمي سيتم خلال ساعات قليلة.
وقال مهيب: “امبارح كان صاحب الانفراد في مصر كلها هو أسامة حسني. أسامة أعلن من خلال برنامج اللعيب إن الأهلي أنهى اتفاقه مع المدير الفني، والإعلان هيكون خلال 48 ساعة. بالفعل، النادي الأهلي خلال دقائق هيعلن عن تولي المدير الفني الدنماركي جيس ثورب تدريب الفريق.”
وتابع مهيب: “ثورب جه بعد مقارنة، أو يعني كان في كلام عن جوميز، لكن كابتن محمود الخطيب رفض وقال بالحرف: خلاص مش هناخد حد من الزمالك دلوقتي بالبلدي. جوميز كمان مرتبط بعقد مع الفتح وشرط جزائي، والخطيب قال: لا، لا، اقفل الملف ده خالص. وفعلاً الملف اتفتح واتقفل، لكنه كان موجود وكان فيه نية للاتفاق، لكن كان فيه رفض كبير جدًا من كابتن محمود الخطيب. قال: لا، مش هنجيب حد تاني من نادي الزمالك، والراجل مرتبط ومش عايزين نخش في دوامة وأفلام.”
وأوضح مهيب: “بالنسبة للمدير الفني الحالي، كان فيه مدرب برتغالي كاختيار أول، لكن لما تيجي تبص على السيرة الذاتية بتاعة الراجل الجديد، تحس إنه شخصية. من شكله وتعبيرات وشه تحس إن الأهلي محتاج الملامح دي. بيضحك بس فيه شراسة، الراجل تحس بص ثعلب.”
وتابع مهيب: “ثورب دنماركي، عنده 55 سنة، سن معقول لا كبير ولا صغير. مسيرته التدريبية كانت مع أندية ايسبرج، منتخب الدنمارك تحت 21 سنة، ميدتيلاند، جينت، جينك، كوبنهاجن، وأوجسبورج. وآخر حاجة دربها كانت أوجسبورج السنة اللي فاتت، يعني مش بعيد، وآخر محطة تدريبية كانت في شهر 5 اللي فات. عدد المباريات اللي لعبها كمدرب 507 مباراة، كسب في 263، وتعادل في 110، وخسر 134. بصراحة مش هو الطموح الكبير للأهلي، لكن عنده مميزات كتير.”
وقال مهيب: “الأهلي مش جايب المدير الفني السوبر ستار، لأن أي مدير فني في الأهلي هو اللي بيتحول لسوبر ستار. الأهلي هو اللي بيصنع المدربين. فايلر مثلاً، مين كان يسمع عنه؟ لما جه الأهلي عمل منه اسم كبير. مانويل جوزيه مثلًا كانت تجربته مع الأهلي ناجحة جدًا، حتى لما راح أنجولا أو إيران وفشل هناك، ده ما يقللش منه. فيه مدربين كتير جم الأهلي واتعملوا فيه، زي توني أوليفيرا وغيرهم، الأهلي دايمًا هو اللي بيصنع الأسماء مش العكس.”
وأضاف مهيب: “تحية كبيرة لأسامة حسني، كان صاحب الضربة أمس، وقال المدير الفني خلص. وفعلاً كان فيه شخصية بارزة أنهت ملف المدير الفني. كل ده إحنا أعلنّاه، وقلنا إن الأهلي هيعلن خلال الأسبوع ده، والراجل هيكون في القاهرة بكرة.”
وتابع مهيب: “عماد النحاس طار، مش هيكمل في الجهاز الفني، واللي هيفضل هو وليد صلاح وعادل مصطفى. والمدرب الجديد قال لعادل مصطفى يفضل عشان يتعلم. يعني بالبلدي كده هو مش عايز حد من الجهاز القديم، وجايب مساعدينه. هيحصل على حوالي 3 مليون دولار في السنة، وده رقم محترم. الأهلي رفع السقف، خلي بالكم، الراجل البرتغالي اللي كان مرشح كان هيأخذ 4 مليون وشوية، لكن خلاص تم حسم القصة لصالح المدرب الجديد جيس ثورب.”
واختتم مهيب عبد الهادي تصريحاته قائلًا: “الأهلي قفل الصفحة خلاص، وكان حاطط في باله حاجة مهمة جدًا وهي بطولة السوبر المصري. الأهلي كان مصمم ينهي ملف المدير الفني قبل السوبر، عشان ما يدخلش البطولة وهو في دوامة مع عماد النحاس. وعشان كده تم الاتفاق مع ثورب بشكل نهائي.”
