شهدت قناة الزمالك حوارًا ناريًا بين الثنائي محمد صبري وأحمد عيد عبد الملك، حيث كشف الأخير كواليس مثيرة عن أزمة تجديد عقد اللاعب محمد السيد، مؤكدًا أنه رفض أكثر من مرة التوقيع رغم الجلسات المتكررة معه من إدارة النادي.
قال محمد صبري خلال الحلقة: “هل كان في مشكلة يا كابتن أحمد لما كنتوا بتطلعوا الدرجة الأولى لو الإدارة قالت تعالى جدد؟ هل كان في لاعب ممكن يرفض أو يفرض شروطه؟”.
ورد أحمد عيد عبد الملك قائلًا: “زمان كنا بنمضي العقود وإحنا مش عارفين بنمضي على إيه، كنا بندخل مبنى الإدارة نمضي ونمشي من غير كلام. أنا كنت حاسس أني في حلم لما بلعب في الزمالك”.
وأضاف: “محمد السيد قعد مع أكتر من 3 أو 4 مسؤولين كبار في النادي زي الكابتن حازم إمام والأستاذ عمرو الجنايني وميدو كمان، والإدارة اللي فاتت حاولت برضه، لكن في الآخر هو مش عايز يجدد”.
وتابع عيد عبد الملك: “أنا مش هدّي لاعب ماتشات وهو مش عايز يجدد، أنا مش هجهز لعيب عشان يروح لحد تاني، ده مش منطقي، واللي مش عايز النادي خلاص ما يستحقش الفرصة”.
