رد هاني أبو ريدة، رئيس اتحاد الكرة، على هجوم الثنائي أحمد شوبير ومجدي عبدالغني لاعبا الأهلي السابقين ضده.
وقال أبوريدة في حوار مع سيف زاهر تم نشره عبر الحساب الرسمي لاتحاد الكرة: “بشأن ظاهرة إن عضو مجلس إدارة كان ممكن يطلع في الإعلام ويهاجم أو ينتقد المجلس أو الرئيس:” أنا ضد الكلام ده تمامًا. أنا موجود في اتحاد الكرة من أكتر من 35 سنة، وعمري ما طلعت أهاجم أو أختلف علنًا مع زميل في الإعلام”.
وأضاف:” المفروض إنك كعضو مجلس إدارة عندك مكانك الطبيعي اللي هو “الترابيزة” داخل المجلس. جوه الترابيزة تتكلم، تناقش، تعترض، لكن برّه الترابيزة خلاص، أنت مواطن عادي، ماينفعش تتدخل في شغل الموظفين، ولا تعلق على قرارات المجلس في الإعلام”.
وشدد ابو ريدة: “تخيل إنّي قعدت في اتحاد الكرة سنين طويلة، وما أعرفش حتى غرفة الحكام فين، عمرها ما كانت شغلتي، ولا كنت أدخل فيها،وده معناه إن كل واحد لازم يعرف حدوده ومسؤوليته كويس”.
وواصل:” أنا بشوف إن المجلس الناجح هو اللي يعرف يحتوي الخلافات داخله، وده اللي بيميز النادي الأهلي في الحقيقة. النادي الأهلي ناجح جدًا في النقطة دي ما بيطلعش خلافاته بره، وبيتعامل مع الاختلاف داخل الغرف المغلقة، وطبعًا، مفيش إدارة من غير أخطاء، لكن الفرق إن الإدارة القوية تعرف تدير الخلاف، مش تخلّيه يظهر للعلن”.
وأجاب أيو ريدة على سؤال هل زعلت من الكابتن مجدي عبد الغني؟ يعني في الفترة الأخيرة كانت هناك انتقادات لإدارتك؟ قائلا: “لا، بصّ، انت بتحافظ على المجلس. انت لو بتاخد قرار مع أي عضو من الأعضاء، مش إنه قرار شخصي، انت بتحافظ على مجلسك، بتحافظ على احترام المكان، مش أكتر.
إنما الحقيقة، كل الناس بما فيهم مجدي بيحبوني جدًا جدًا، وعلى المستوى الشخصي لما أشوف مجدي أضحك. ما عنديش غُضاضة ولا عندي المشكلة دي تمامًا.”.
واردف:” هل التصريحات بتزعلك؟ لا متوقفتش عندها خالص، ولا أسمعها”.
واكمل أبو ريدة: “هل تنزعج من انتقادات شوبير؟ باخدها إن شوبير يطلع الميكروفون ما بيشوفش أحيانًا، يعني شوبير أضحك معاه دايمًا، أقول له: “انت ليه كده يا حاج؟ الصبح تقول كده، هو يقول: “واحد اشتكى من سيف، أطلع أخبط في سيف”، وبعدين أقول له: “ده سيف حبيبي”، يقول لي: “آه مش واخد بالي، تصدق؟” فهو يعني ليه كاركتر خاص بيه”.
وزاد:” فما بزعلش أنا إطلاقًا. وأشوفه عادي جدًا، فشوبير يقول لي: “ده انت مش زعلان مني؟”، أقول له: “لا، ليه؟”، يقول: “أصل أنا قلت كذا”، أقول له: “ما تقول اللي انت عايزه، ولا يهمك”. جوا نفسيتي ما عنديش مشاكل مع حد خالص”.
