فجّر الإعلامي مهيب عبد الهادي مفاجأة من العيار الثقيل، بعد كشفه كواليس جديدة تتعلق بعقد لاعب الزمالك السابق أحمد سيد زيزو، وذلك عقب الجدل الذي أثاره عبد الواحد السيد بحديثه عن تفاصيل العقد وقيمته الحقيقية.
وقال مهيب عبد الهادي في تصريحات عبر برنامج “اللعيب”، على قناة “mbc masr”: “مين الحاجات المهم جدا اللي بننفرد بيها في برنامج اللعيب.. أمس كابتن عبد الواحد السيد فتح ملف مهم جدا، هو ملف عقد زيزو”.
وتابع: “وقال إن عقد زيزو 20 مليون يوصل لـ 23 مليون بالضرايب عشان يصفي الـ 20 مليون ثلاث سنين وزيزو خد فلوسه ومالوش أي مستحقات.. ناقص له 4 مليون يا ياخدهم غرامات أو ما ياخدهمش. نركز مع بعض شوية”.
وأضاف: “وطلع العقد كده وبص فيه وقال لك إن العقد ده 20 مليون يوصل لـ 23 أو 25 عشان الضرايب، المهم يبقى يصفي 20 مليون ده ياخدهم زيزو. لحد كده الكلام جميل”.
وواصل: “يعني لحد كده الكلام صحيح؟ اه صحيح. أمس كلمني كابتن أحمد سيد زيزو رداً على كلام كابتن عبد الواحد السيد وتصريحات كابتن عبد الواحد السيد”.
وأردف: “وقال لنا تصريحات خاصة لبرنامج اللعيب.. ماذا قال زيزو في هذه المكالمة الهاتفية لبرنامج اللعيب وليه يعني؟ اتكلم الراجل عشان يرد على عبد الواحد السيد”.
واستكمل: “وقال كلام خطير جدا جدا جدا. أولاً قال لك الكلام اللي قاله صحيح، أن العقد الرقم والضرايب وكل ده 100%. لكن هناك بنود مكملة للعقد.. في مع العقد بنود مكملة للعقد وليست مفسرة للعقد. كلامي ده مهم جدا”.
وأشار: “وده بيعتبر زي العقد تماماً. البنود دي تعتبر حوافز، حاجات محطوطة في العقد بونص وهي ليست مفسرة، هي مكملة. يعني زي العقد بالظبط. طيب، البنود دي بتنص على إيه؟ أن زيزو يحصل في السنة الأولى على 20 مليون”.
واستكمل: “ده بعيد عن العقد.. العقد أهو ركنّاه وأنت صح والزمالك صح وكلكم صح. زيزو ياخد 20 مليون في السنة الأولى، في السنة الثانية 15 مليون، في السنة الثالثة 15 مليون.. يعني وصلنا لـ 50 مليون”.
واستمر: “بالإضافة إلى أن هناك نسبة مشاركة. لو شاركت يا عم زيزو في أكثر من 15 مباراة بتاخد 3 مليون 300 في السنة. اضرب في ثلاثة وصلنا لـ 10 كمان بقوا 60 مليون. الكلام ده بالحرف الواحد. ننفرد به من خلال برنامج اللعيب وهي مكالمة زيزو بالأمس رداً على تصريحات كابتن عبد الواحد السيد: “أنا لي 82 مليون جنيه عبارة عن بنود مكملة في العقد. مكملة وليست مفسرة للعقد”.
وواصل: “يعني زيها زي التعاقد. ودي اللي في اتحاد الكورة حالياً ودي نقطة الخلاف ما بين زيزو ونادي الزمالك”.
واستمر: “كل واحد ياخد حقه. أنت بتدور على حقك وأنا بدور على حقي. طيب. قال لك نسبة الإعلانات. قال لك الزمالك كان طالب 20 مليون أو حاطط 20 مليون إعلانات. أنا عملت إعلان واحد بـ 5000 دولار وده اللي منصوص واللي مكتوب في العقد. سيبك بقى وخد إيه بس المنصوص ومكتوب في عقد الإعلانات عمل إعلان واحد بـ 5000 دولار. يعني نسبة الـ 20% حوالي 1000 دولار. ده اللي مكتوب”.
وشدد: “ولو في حاجة عملها زيزو، احنا بنتكلم على فكرة من 2023 بعد ما عقده اتعدل.. وفي طبعاً بدل سكن. ما هو حد هيقول لي إيه؟ طيب أنت وصلت 20 و15 و15 ادي 50 و10 نسبة مشاركة ادي 60. طب الباقي؟ الباقي بقى حاجات بقى ايه؟ حلويات، حاجات كده جميلة، بدل سكن، حاجات، بتتحط بقى زي لعيبة الكورة، امتيازات”.
وأشار: “أنت عندك محمد صلاح بيحط الأسيست امتياز. المشاركة في كم مباراة امتياز. الهدف امتياز.. بره كده بره بيحط لك عقدك أنت بتاخد 10 قروش والبونص بتبقى قد العقد 20 مرة. لو شاركت في كم مباراة هتاخد قد ايه؟ لو عملت أسيست في كم مباراة قد ايه؟ ولو عديت 10 أسيستات تاخد فلوس تانية. ولو عديت 10 أهداف تاخد فلوس تانية. ولو عديت 15 تاخد فلوس ثالثة. ولو عديت 20 تاخد فلوس رابعة”.
واستطرد: “هي هي العقود كده.. فمش هو العقد إيه؟ أنت حضرتك بتاخد 20 خلاص هم الـ 20 وخلاص. لا لا مش الكلام ده. مش الكلام ده”.
وتابع: “فهنا في برنامج اللعيب كلنا على مسافة واحدة. الزمالك نادي كبير ولكن كلها التعاقدات بتكون شؤون قانونية وإدارية. هل أحمد سيد زيزو هو اللي هيقول أنا هاخد كام؟ لا. هل نادي الزمالك هو اللي هيقول هيتصرف لزيزو كام؟ لا. كل الأمور دي اللي هيفصل فيها لجنة شؤون اللاعبين”.
واختتم: “عشان كده في حاجة اسمها لجنة شؤون لاعبين وده بيقدم أوراقه وده بيقدم أوراقه وده بيقدم معطياته، وفي الآخر بيطلع الفلوس اللي هيتقال عليها من اتحاد الكورة وممكن بعد كده ما تعجبش زيزو يلجأ للفيفا. أنا بتمنى أن هذه الأمور تتم في غرفة مغلقة ويتقفل الموضوع ده نظراً للعلاقة الكبيرة ما بين أحمد سيد زيزو ونادي الزمالك”.
