شاهد مقدمة نارية من ميدو بشأن مايحدث للزمالك وأزمة أرض أكتوبر.. “الجمهور بيكلم نفسه”- فيديو
عبر أحمد حسام ميدو نجم الزمالك السابق، عن غضبه الشديد لما يمر به الفارس الأبيض مؤخرا، ومعاناة النادي من الأزمة المالية، بعد قرار سحب أرض 6 أكتوبر.
وقال ميدو خلال تصريحات تليفزيونية ببرنامجه “أوضة اللبس”، على قناة” النهار”: جمهور الزمالك بيكلم نفسه بسبب سحب أرض أكتوبر، ورئيس الوزراء نفسه أقر بصحة أوراق نادي الزمالك في الأرض دي، والجماهير بتطالب إن الأرض ترجع لحوزة النادي بما لا يخالف القانون بكل تأكيد”.
وتابع : “مش قادر أفهم إزاي سايبين نادي بحجم نادي الزمالك في كل هذه الأزمات والمشاكل؟ والله أنا هتجنن، مش فاهم حاجة ولا فاهم إيه اللي بيحصل، هل في مسؤول في الدولة يرضى إن الزمالك يحصل فيه كل ده؟”.
وواصل ميدو:” من حق جمهور الزمالك يفهم الأرض اتسحبت ليه، سواء بخطأ من الإدارة أو خطأ في الأوراق، لازم الجمهور يعرف السبب. نفسي في حياتي أشوف الزمالك نادي عادي بيمارس حياته بشكل طبيعي بدون أزمات، الزمالك في ظل الظروف الصعبه دي بياخد بطولات بالجمهور اللي معه”.
واشار: “أقسم بالله ما هطلع أتكلم عن أي خطأ داخل النادي إلا لما أعرف مصير أرض أكتوبر إيه أو اتسحبت ليه من النادي، ده حقي وحق كل الزملكاوية يعرفوا أرض أكتوبر اتسحبت ليه”.
وشدد ميدو: حرام جمهور نادي الزمالك، حرام الجمهور يبقى متأثر ومش عارف مصيره، أرجوكم ادوا للزمالك حقه، رسالة للزملكاوية اتحدوا، حطوا إيديكم في إيدين بعض، وانسوا المشاكل، ده مش وقت تصفية حسابات”.
وأكمل:”ما يمر به النادي حاليًا ليس نتيجة أخطاء أفراد، بل أزمة عامة أثرت على كل مفاصل النادي، الأزمة المالية الحالية وأزمة سحب أرض أكتوبر مش أخطاء فردية، دي أزمة كبيرة جدًا والوضع صعب للغاية فيه ضرر مادي كبير حصل لنادي الزمالك بعد سحب الأرض، والنادي بيعاني ماديًا من كل الاتجاهات. ”
وزاد ميدو: “المشجع اللي ظهر في ماتش القمة وهو بيبكي بعد الخسارة من الأهلي كان بيبكي لأنه حاسس بالظلم، مش بس عشان النتيج، المواقف دي عمرها ما هتهد الزمالك، ولا هتهد جمهور الزمالك، بالعكس، دي المواقف اللي بتقوي النادي وتثبت إن جمهوره هو السند الحقيقي”.
وأستطرد:” أنا عندي جروب واتساب اسمه الزملكاوية، فيه 40 أو 50 زملكاوي محترم، كلهم بيعشقوا نادي الزمالك وبيحاولوا يساعدوا النادي من فلوسهم الخاصة وبيحولوا مبالغ لحساب النادي”.
واختتم: “جماهير الزمالك تستحق الشفافية ومعرفة الحقائق كاملة حول ما يحدث داخل ناديهم، مشيرًا إلى أن استمرار الغموض يزيد من حالة الإحباط بين محبي النادي”.
شاهد:
" جمهور الزمالك بيكلم نفسه"
مقدمـة نـــ🔥ــاريه وانفـ ـعال من ميدو بسبب ما يحدث للزمالك ويؤكد "النادي بينهار" #النهار #عودة_أوضة_اللبس#انقذ_الزمالك_يا_ريس @midoahm pic.twitter.com/TpVS1oDXiu— Odetlebsmido (@Odetelbs) October 7, 2025
