تحدث الإعلامي أحمد شوبير عن آخر تطورات الحالة الصحية لنجم النادي الأهلي إمام عاشور، موضحًا تفاصيل جديدة حول نتائج التحاليل الطبية التي خضع لها اللاعب خلال الأيام الماضية.
وقال شوبير في تصريحات عبر برنامجه الإذاعي صباح اليوم الأحد: “بصوا يا جماعة، في أخبار كتير جدًا شغالة اليومين دول عن إمام عاشور، وأنا حابب أطمنكم بمنتهى الوضوح، لأن أنا متواصل مع إمام نفسه كل يومين تلاتة كده، وبسأله وأطمن عليه بنفسي.”
وأضاف: “التحاليل بتاعته الحمد لله بقت أحسن بكتير، هو المفروض النسبة تنزل تحت الـ50، وكان الأسبوع اللي فات وصل لـ70، وده كان مؤشر كويس جدًا للدكاترة اللي بيتابعوه. بعد كده عمل تحليل تاني، والنسبة نزلت فعلاً تحت الـ50، تقريبًا بقت 45، وده طمّن الكل جدًا، سواء في الجهاز الطبي أو في النادي.”
وتابع شوبير: “إمام بقى مش قادر يستنى، عايز ينزل الملعب فورًا، وطلب من الدكتور إنه يروح النادي، بس الدكتور قاله تعالى مفيش مشكلة، بس بلاش تنزل الملعب دلوقتي، خلينا خطوة بخطوة.”
وأكمل: “الولد نفسه متحمس جدًا، وعايز يلحق ماتش السوبر، بس الموضوع محتاج تدرّج، يعني يرجع واحدة واحدة. بس في حاجة حلوة جدًا، إن المدير الفني توروب معجب جدًا بإمام، وشايف إنه لاعب مهم جدًا، وعايزه يرجع بسرعة.”
واختتم شوبير كلامه قائلًا: “أنا بقول لكم الحقيقة زي ما هي، من غير اجتهاد ولا زيادة، كل حاجة مؤكدة 100%. إمام حالته الحمد لله مستقرة جدًا، وقدامه أيام بسيطة ويرجع يشتغل مع الفريق، والكل في الأهلي مبسوط بالتطور ده.”
