كشف الإعلامي أحمد شوبير عن آخر التطورات الخاصة بالمدير الفني الجديد للنادي الأهلي ييس توروب، واستعداداته لبدء مهمته مع الفريق.
وقال شوبير في تصريحات عبر برنامجه الإذاعي: “ييس توروب وصل، بس فريق عمله لسه ما اكتملش، لأن أغلب مساعديه شغالين في أندية تانية وبيفسخوا عقودهم دلوقتي، في منهم خلص وفي منهم لسه، فهو بيحاول يكمّل جهازه الفني، وعايز ينزل الملعب وهو معاه التيم كله، وكمان مستني رجوع اللاعيبة من المنتخب تقريبًا.”
وأضاف: “التمرين اللي فات كان بقيادة الكابتن عادل مصطفى، وتوروب حضر وتفرج عليه، وبكره إن شاء الله هينزل يقود التمرين بنفسه، حتى لو فريقه ما اكتملش لسه، هو حابب يتعرف على الأوضاع واحدة واحدة، ويشوف الدنيا ماشية إزاي.”
وأكد شوبير: “فيه ترحيب كبير جدًا من جمهور الأهلي بالمدرب الجديد، وسعادة واضحة بالتعاقد، والجماهير دلوقتي راضية جدًا عن اختيار المدرب.”
وتابع: “بصراحة، الجماهير مكانتش راضية عن التعاقد مع ريبيرو في الأول، وكان عندهم تخوف، وقالوا وقتها إنهم هيساندوا المجلس بس هما مش مقتنعين بيه.”
واختتم كلامه قائلاً: “ريبيرو مشي، ودي في الآخر وجهات نظر، محدش يزعل منها، بس دلوقتي الكل شايف إن الأهلي ما استرخصش ولا جاب مدرب عادي، بالعكس، جاب مدرب قوي ومميز، والجماهير عندها حالة تفاؤل كبيرة جدًا بيه.”
