فجّر الإعلامي أحمد شوبير مفاجأة من العيار الثقيل حول أزمة نادي الزمالك مع لاعبه محمود بن تايج، مؤكدًا أن المشكلة ليست مجرد خلاف مالي، بل انعكاس لأزمة إدارية ومالية طاحنة يعيشها النادي في الفترة الأخيرة.
وقال شوبير، خلال برنامجه الإذاعي صباح اليوم الثلاثاء، إن وكيل اللاعب يوسف مسعد أبدى استياءه الشديد من إدارة الزمالك بسبب تأخر صرف مستحقات موكله لمدة شهرين، وعدم الرد على اتصالاته، مشيرًا إلى أن الوكيل هدّد باللجوء إلى محكمة التحكيم الرياضي الدولية (كاس) لاسترداد حقوقه وحقوق نادي سانت إيتيان الفرنسي.
وتابع شوبير: “المعلومات المؤكدة بتقول إن الزمالك بيحاول يحل الأزمة خلال الأسبوع المقبل، وهيقعد مع اللاعب ويدفع له جزء من مستحقاته عشان يقفل الملف. لكن الواضح إن المشكلة أعمق من كده، لأنها جزء من أزمة مالية خانقة داخل النادي.”
وأضاف موضحًا: “المجلس الحالي دفع مبالغ ضخمة جدًا، لكن ما زالت الملفات مفتوحة. جمهور الزمالك مش محتاج يسمع كل يوم عن أرض أكتوبر أو أمور داخلية، هو عايز يشوف فريقه بيلعب وبيكسب وبيمثل القلعة البيضاء في البطولات القارية زي زمان.”
وأردف شوبير: “الناس كانت فرحانة لما الزمالك كسب الكأس على حساب بيراميدز، وفرحت أكتر ببطولة الكونفدرالية على نهضة بركان، لكن الخسارة الأخيرة من شيلبويس الجنوب إفريقي في القاهرة كانت صدمة كبيرة لجماهير الزمالك.”
وشدد: “الجمهور ملوش ذنب، اللي بيتولى المسؤولية لازم يكون قدّها. المجلس الحالي عارف الأزمات كويس جدًا، ووعد الناس إنه هيحلها. فلازم يلتزم بالوعود دي.”
وأشار شوبير أيضًا: “الزمالك في النهاية نادٍ لكرة القدم، مش بس منشأة رياضية فيها ألعاب تانية. لما الفريق الأول بيتأثر، النادي كله بيتهز. نفس اللي حصل في الأهلي لما اتراجع الأداء في بداية الموسم، لكن الأمور اتظبطت بعد الفوز على الزمالك.”
وأكد: “سألت عن الكابتن حسين السيد وقالوا لي إنه شغال بجد في قطاع الناشئين ومخلص جدًا للنادي، لكن في أعضاء تانين سايبين الدنيا وما بيشاركوش في الحل. وده مش مقبول، لأن العضو المنتخب مسؤول عن المساهمة في حل الأزمات مش في تحقيق مصالح شخصية.”
واختتم شوبير حديثه قائلاً: “محمود بن تايج لاعب محترم ومؤدب جدًا، بيصلي معانا في المسجد، ومتربي، وما بيرفضش طلب من حد. أتمنى إن الموضوع يتقفل بأسرع وقت، لأن الزمالك محتاج يركّز في الملعب مش في الملفات المفتوحة.”
