شوبير يفتح النار على قرار الاتحاد السكندري قبل مواجهة الأهلي في الدوري.. ويضرب مثالًا بـ الزمالك! فيديو
أكد الإعلامي أحمد شوبير أن من غير المنطقي أن يخصص نادي الاتحاد السكندري مكافآت استثنائية للاعبيه في مباراة بعينها، مشيرًا إلى أن مبدأ التحفيز يجب أن يُطبق على جميع المباريات دون استثناء، لأن كل مواجهة في الدوري تساوي ثلاث نقاط.
وقال شوبير في تصريحات عبر برنامجه الإذاعي صباح اليوم الاثنين: “في نادي الاتحاد السكندري هنا هقف شوية، النادي قرر يرصد مكافأة استثنائية قدرها 5500 جنيه مكافأة فورية لكل لاعب في حالة الفوز على الأهلي في الدوري يوم الأربعاء الجاي.”
وتابع: “حلو وجميل إنك تحفّز اللعيبة، بس أنا عايز أسأل سؤال لمسؤولي نادي الاتحاد. على فكرة، محمد أحمد سلامة رئيس النادي راجل محترم جدًا وبيشتغل بضمير، واتكلمت معاه من كام يوم وقال لي: أنا بجتهد بكل ما أوتيت من قوة.”
وأضاف: “السؤال هنا بقى للجماعة الأفاضل في الاتحاد السكندري: مباراة الاتحاد مع حرس الحدود أو فاركو أو سيراميكا أو مودرن أو أي فريق تاني، مش برضه بثلاث نقاط زي مباراة الأهلي؟”
وواصل: “يعني لو المبدأ إنك هتعمل مكافأة استثنائية، ما تعملهاش بس قدام الأهلي أو الزمالك، حفّز اللعيبة في كل المباريات. قولهم مثلًا لو كسبتوا تلات ماتشات ورا بعض، هيبقى في مكافأة كذا في كل ماتش. كده يبقى التحفيز منطقي، لأن في الآخر كل ماتش بثلاث نقاط.”
وأشار شوبير: “اللي بيحصل إن الاتحاد ممكن يدخل في مشكلة، لأن عندك سبع فرق بتنافس على البطولة، وفريق بيحاول يهرب من الهبوط، وأربع فرق هتهبط، وكل فريق بيجمع نقاطه.”
وشدد: “يا ريت التحفيز يكون موجود في كل الماتشات، لأن في مدربين بيريّحوا لعيبة عشان عندهم ماتش مهم بعد كده، فبيراح في الماتش ده ويخسر نقاط”.
وأكد: “يا جماعة، كل ماتش بثلاث نقاط. صحيح أوقات بتبقى خايف من إصابة أو ضغط مباريات، بس لازم المبدأ يكون ثابت: مافيش ماتش أهم من التاني.”
وأردف: “طبعًا لو الماتش ده هيصعدك نهائي كأس أو يخليك تكسب بطولة، ده موضوع تاني ومقبول، لكن فكرة إنك تهتم بمباراة على حساب التانية دي مش صح، وده رأيي اللي دايمًا بقوله سواء على الأهلي أو الزمالك.”
واختتم شوبير تصريحاته قائلًا: “أنا كنت قايل قبل كده، قبل ماتش الزمالك والجونة اللي كان قبل لقاء القمة، إن الزمالك وقتها قال لـ خوان بيزيرا ياخد إنذار عشان يلعب ماتش الأهلي، فاللاعب غاب عن ماتش الجونة، والنتيجة إن الزمالك اتعادل وخسر نقطتين مهمين جدًا في سباق الدوري.”
