شوبير يفجر مفاجأة مدوية: تحرك جديد من الأهلي لتجديد عقود الثلاثي بعد وصول ييس توروب! فيديو
أكد الإعلامي أحمد شوبير أن إدارة النادي الأهلي بدأت التحضير لملف تجديد عقود عدد من لاعبي الفريق الذين تنتهي عقودهم بنهاية الموسم الحالي، موضحًا أن لجنة التخطيط وضعت آلية جديدة للتفاوض مع اللاعبين.
وقال شوبير في برنامجه الإذاعي صباح اليوم الأحد: “موضوع اللاعبين اللي الأهلي هيفاوضهم واضح جدًا، حسين الشحات، وأحمد نبيل كوكا، وأحمد عبد القادر، التلاتة عقودهم بتنتهي السنة دي، والأهلي ناوي يبدأ التفاوض معاهم قريب. لجنة التخطيط هتحط الأرقام المقترحة، وبعد كده الكابتن وليد صلاح هيناقشها معاهم، وبعدين يقدم العروض الرسمية لكل لاعب.”
وأضاف: “الكابتن وليد صلاح دلوقتي مسؤول عن كل ما يخص ملف الكورة في الفريق الأول، عشان تبقى الصورة واضحة للجميع. بعد ما اللجنة تحط الأرقام، بيتم تحديد القيمة المالية لكل لاعب، زي مثلًا أحمد شوبير 10 قروش، وائل سعيد 15، ومحمد إبراهيم 12، وهكذا، وبعد كده بيتعرض العرض على اللاعب، وكمان ضافوا نظام البونص الجديد اللي هو المكافآت حسب الأداء والمشاركة.”
وتابع شوبير: “لحد دلوقتي مفيش مفاوضات رسمية بدأت مع التلاتة دول، لكن أكيد الكابتن وليد عنده فكرة عن وجهة نظر كل لاعب، والتفاصيل دي هتتضح أكتر في الفترة الجاية.”
وانتقل شوبير للكلام عن موقف الأجانب في الأهلي، وقال: “ملف اللعيبة الأجانب كله اتحوّل للمدير الفني الجديد، الدنماركي ييس توروب. النادي قاله خلاص يا كابتن، الملف ده بتاعك بالكامل، وشوف بنفسك مين هيكمل ومين لأ. أهم حالة طبعًا هي أليو ديانج، اللي خلاص من حقه في يناير يوقّع لأي نادي عايزه.”
وأكمل: “ديانج عنده عروض من السعودية بعد ما عمل موسم ممتاز هناك قبل كده، والمدرب هو اللي هيقرر، هل هيكمل معاه ولا هيبدأ النادي يجهّز لرحيله. القرار المرة دي هيكون بالكامل في إيد ييس توروب.”
واختتم شوبير كلامه قائلًا: “الأهلي شغال بخطة واضحة ومدروسة، فيها تنسيق بين لجنة التخطيط والمدرب الجديد، وكل الهدف إن الفريق يفضل في حالة استقرار فني وإداري في المرحلة الجاية.”
