شوبير يفجّرها: “في ناس كانت عايزة المنتخب يخسر… والطائرة الخاصة كشفت المستور! فيديو

أكد الإعلامي أحمد شوبير، خلال حديثه في برنامجه الإذاعي صباح اليوم الإثنين، أن قضية الطائرة الخاصة التي سيسافر بها المنتخب أثارت حالة من الجدل بين الجماهير، موضحًا أن هناك تفاصيل غير معلنة وراء القرار، وأن ما يحدث له أسبابه ومبرراته المنطقية.

وقال شوبير: “تعالوا بس نقف عند موضوع الطيارة الخاصة ده، عشان في ناس قالتلي: الله، المنتخب الأول مسافر في طيارة خاصة، والمنتخب التاني كمان في طيارة خاصة، طب ليه ما يسافروش سوا؟”

وتابع: “المنتخب الأول فعلاً مسافر في طيارة خاصة، وده أنا متأكد منه. إنما المنتخب التاني مسافر في طيارة خاصة؟ لأ، أنا مش متأكد، وماعتقدش يعني. بس خليني أقولها بمنتهى الوضوح ومن غير تجميل ولا تلطيف: لأ، ما يسافروش مع بعض. فيه حاجات كتير إحنا بنغطي عليها وبنعدّيها عشان المركب تمشي، بس والله العظيم لو أنا في اتحاد الكورة، في حاجات ما كنتش أعديها أبداً.”

وأضاف: “لأن فيه ناس بكل أسف محسوبة على المنظومة، كانوا عايزين يفرملوا منتخبنا الوطني. وقبل ماتش بوركينا فاسو بالذات، كانوا عايزين يعملوا مشاكل، عشان لو خسرنا، الدنيا تتكهرب، ويبقوا مبسوطين وفرحانين! والنوعيات دي موجودة، وأنتم عارفينهم كويس، بالاسم، ومش محتاج أقول أسامي.”

وأردف: “يعني باختصار، مش أنا بس، أغلب الزملاء الإعلاميين ماشيين في سكة إننا نساند المنتخب ونقف وراه. إحنا عايزين نكسب ونتأهل، فموضوع إن المنتخبين يسافروا سوا؟ لأ، ما يسافروش سوا، وأنا موافق على كده 100%. ربنا يوفق ده ويوفق ده، الاتنين منتخبات بلدي، وواجب عليا أساعدهم وأساندهم.”

واختتم كلامه قائلاً: “وأنا من المحبين جدًا للكابتن حلمي طولان، وباحترمه جدًا، لكن دلوقتي لازم نقف ورا منتخبنا الأول بقيادة الكابتن حسام حسن، وإبراهيم حسن، وطارق سليمان، ومحمد عبد الواحد، وسعفان الصغير، والدكتور محمد أبو العلا، وباقي الجهاز المعاون، لأن دعم المنتخب في المرحلة دي واجب 100% عشان نفوز ونوصل لنهائيات كأس العالم بإذن الله.”