تحدث الإعلامي أحمد شوبير عن آخر مستجدات حالة لاعبي الأهلي قبل مباراة السوبر المقبلة، موضحًا موقف المصابين من العودة للمشاركة، ومؤكدًا أن المدافع المغربي أشرف داري لم يتلق أي عروض من أندية خارجية كما تردّد.
وقال شوبير في تصريحاته عبر برنامجه الإذاعي صباح اليوم الثلاثاء: “كريم فؤاد زي ما قلتلك، الأهلي هيكون بيلعب مع الاتحاد السكندري وكريم هيكون بيتمرن بالفعل، شارك في المران الجماعي وخلص برنامجه التأهيلي كله، والدنيا عنده ماشية كويس جدًا.”
وتابع: “مشاركته من عدمها دي وجهة نظر الجهاز الفني، بس المؤكد بنسبة 100%، لا 1000%، إنه مش هيلعب ماتش بتروجيت، ودي مفيهاش كلام.”
وأضاف: “أحمد رضا لسه بيؤدي تدريبات تقوية على الركبة تحت إشراف الدكتور أحمد جب الله، بس اتحسن جدًا، وكان ممكن ينزل التمرين، لكن الدكتور فضل يستنى شوية لحد ما يطمن عليه تمام.”
وواصل: “محمد شريف مش هيلعب السوبر، وكمان حسين الشحات. شريف بيخضع لتدريبات تأهيلية، بس لسه قدامه شوية وقت عشان يرجع.”
وأشار: “بالنسبة لأشرف داري، القصة مش واضحة، كل شوية يقولوا هيقرب من الرجوع وبعدين يرجعوا يقولوا استنوا شوية، وللعلم مفيش أي عرض جِه من أي نادٍ ليبي زي ما اتقال.”
واستكمل: “مافيش نادي ليبي طلب أشرف داري، ولا هو رفض عرض زي ما الناس قالت، الكلام ده ما حصلش أصلًا. الأهلي بس بيدرس مستقبل داري زي ما بيدرس مستقبل كذا لاعب، وأنا قلت ده مليون مرة قبل كده.”
وأردف: “الإدارة كلها أدّت تفويض للمدير الفني يِس توروب إنه يقرر في موضوع اللاعبين الأجانب، سواء أشرف داري أو أليو ديانج أو الباقيين اللي موجودين في الفريق.”
واختتم شوبير تصريحاته قائلًا: “محمد علي بن رمضان مفيش عليه مشاكل، وأشرف بن شرقي كمان تمام، وجراديشار مفيش عليه أي مشكلة خالص. الأهلي دلوقتي مفيهوش رأس حربة جاهز، حتى شريف المصري اتصاب، والمهاجم الصغير الواعد حمزة عبد الكريم هيغيب شهر عشان كأس العالم، فالأهلي هيستنى يشوف موضوع المهاجمين، لكن مش شايف إن في أي مشكلة تخص جراديشار.”
