تحدث الإعلامي أحمد شوبير عن ملف صفقات الأهلي الجديدة، موضحًا أن الحديث المتكرر عن “الصفقات” أصبح مبالغًا فيه على مواقع التواصل الاجتماعي، مشددًا على ضرورة أن تكون التعاقدات وفق احتياجات الفريق الحقيقية.
وقال شوبير في تصريحاته عبر برنامجه الإذاعي صباح اليوم: “قصة الصفقات بقت أسهل كلمة على لسان السوشيال ميديا والجماهير، كل شوية نسمع صفقات صفقات، لكن القصة مش كده خالص. الموضوع إنك لازم تشوف الفريق محتاج إيه بالضبط.”
وأضاف: “الأهلي طبعًا محتاج رأس حربة، ومحتاج ظهير أيسر مع شكري، وكمان محتاج بكلفت. لكن في نفس الوقت عنده وفرة كبيرة جدًا في قلوب الدفاع، أو زي ما كنا بنسميهم زمان السرد باك، ما شاء الله عنده أعداد كبيرة في المركز ده.”
وتابع: “في كلام بيتقال، ومش متأكد من صحته، إن في تواصل حصل مع محمد عبد المنعم عشان يرجع إعارة، لكن بصراحة أنا ما تواصلتش معاه، وهو دلوقتي في قطر بيعمل علاج طبيعي، وبيحاول بكل الطرق يلحق بطولة أمم أفريقيا في شهر 12.”
وأردف: “في ناس بتقول محتاجين باك رايت وباك ليفت، ومحتاجين قلبين دفاع، واتنين في نص الملعب، وجناح يمين وجناح شمال ورأس حربة. يعني تسع لاعيبة! طيب هتجيبهم منين؟ وهتمشي كام أجنبي وتجيب كام لاعب محلي؟ لازم يكون فيه منطق في الكلام.”
واختتم شوبير تصريحاته مؤكدًا: “يا جماعة، مش أي كلام يتقال يبقى حقيقي. لازم كل صفقة تكون مدروسة وتخدم الفريق فعلاً مش مجرد كلام أو إشاعات.”
