في تعقيب ناري جديد، انتقد الإعلامي الأحمر أحمد شوبير طريقة إدارة اتحاد الكرة المصري لملف العقوبات والانضباط، موجّهًا انتقادات حادة لما وصفه بـ”غياب العمل المؤسسي” داخل المنظومة، وذلك بعد تفجير أزمة دونجا لاعب الزمالك وأحقية المشاركة مع فريقه في السوبر المصري.
وقال شوبير في تصريحات عبر برنامجه الإذاعي صباح اليوم الثلاثاء: “أنا الحقيقة مش هقدر أفوت موضوع دونجا كده من غير ما أتكلم فيه، لأنه لازم أتكلم فيه وأتكلم فيه كتير، لأن الحاجات دي أنا بصرخ عليها من زمان، والناس بتقعد تاخد كلامي باستهتار أو بعدم اهتمام، لأن دايماً أنا بحب العمل المؤسسي. ما فيش حاجة اسمها لجنة المسابقات شخص واحد، أو حد بياخد القرار لوحده. ما فيش حاجة اسمها كده في الدنيا كلها، في أي حتة. لازم اللجنة تجتمع، تصدر قراراتها بمحضر رسمي، ويتوثق كل شيء، وده اللي أنا بقوله لكم طول عمري. أكيد فاكرين إن أنا قلت الكلام ده أكتر من مرة، يمكن ألف مرة.”
وتابع: “حتى امبارح لما اتسألت، قلت إن الزمالك ما عندوش ورقة ولا جواب رسمي. ما فيش أي مستند عند الزمالك، طب يعمل إيه؟ واحد من الأصدقاء المستمعين بعت رسالة قال إن الزمالك لازم يأمن نفسه ويبعت لاتحاد الكرة، وده اللي حصل فعلاً. الزمالك بعت لاتحاد الكرة يستفسر: (دونجا يشارك ولا لا؟)، وده كان إجراء روتيني قبل البطولة، لكن ما جاش رد. فبعت تاني يوم 26، اللي هو أول امبارح، يسأل: (هل في لاعيبة عليها عقوبات؟)، لكن محدش كان عارف حاجة.”
وأضاف: “حتى الأستاذ أبوده، الراجل ما كانش موجود في الاتحاد، فطلب يشوف المستندات عشان يرد رسمياً، فقالوا له: ما فيش مستند. استغرب وقال: طب هاتولي محضر الاجتماع؟ قالوا: ما فيش اجتماع. طب خطاب رسمي أو وارد أو صادر؟ قالوا: ما فيش. يعني مفيش ولا ورقة، ولا حتى محضر، ولا خطاب بعلم الوصول، ولا حاجة. في الآخر لقوا خبر مكتوب على موقع اتحاد الكرة، بس حتى ده ما كانش كافي.”
وأردف: “فجأة لقوا الدكتور إيهاب الكومي، عضو مجلس إدارة الاتحاد السابق، ناشر خطاب العقوبة على السوشيال ميديا! أول مرة أشوف حاجة زي كده في حياتي. استغربت جدًا، وقلت: هو جابه منين؟، سمعت إن الأستاذ جمال علام هو اللي إداله الخطاب. بدأوا يستفسروا، فكلموا الحاج عامر حسين، قال لهم: آه، أنا بلغت وليد العطار بالعقوبة بالتليفون! بالتليفون يا جماعة! هو ده اللي أنا بتكلم عنه.”
وواصل شوبير حديثه قائلاً: “يعني الأحداث اللي حصلت في الإمارات بكل تفاصيلها من سفر ومنع وعقوبات، ما كانتش محتاجة لجنة المسابقات تجتمع رسميًا؟ حاجة بسيطة وسهلة، يجتمعوا ويصدروا قرار رسمي، مش بالتليفون. يا دكتور وليد، يا أستاذ وليد عطار، تقولوا قررنا معاقبة فلان وفلان طبقًا للائحة. طيب ماشي، بس فين الاجتماع؟ ليه ما بتجتمعوش؟ هو الاجتماعات بقت حرام؟”
واستكمل: “هو أنا لما أقول رابطة الأندية أو اتحاد الكرة لازم يجتمعوا، ده عيب؟ ولا ده الصح الطبيعي؟ مجلس إدارة أي نادي بيجتمع وبيصدر قرارات رسمية، ليه عندنا ده مش بيحصل؟، أنا عندي مثلاً رابطة الأندية فيها سيادة النائب أحمد دياب، والأستاذ إبراهيم الكفراوي، وغيرهم. وللمرة الألف قلت للنائب أحمد، وزعل مني: يا فندم، اجتمعوا وطلعوا قرارات رسمية تخلي الأمور تمشي بمؤسسية واحترام.”
واستمر قائلًا: “وأنا في اتحاد الكرة قبل كده، كنت بقول لازم لجنة المسابقات تتشكل وتجتمع يوم ثابت في الأسبوع، وليكن يوم الاثنين، وتصدر قراراتها بمحضر رسمي يوصل للمدير التنفيذي، وتكون القرارات صادرة باسم اتحاد الكرة، ولو في رد يبقى فيه وارد رسمي وهكذا، لكن للأسف، لما كنت بعمل كده وزّعلوا مني. كنت دايمًا أقول لهم: يا جماعة، اجتماع مجلس الإدارة يوم كذا، وجدول الأعمال كذا، وأي عضو عنده بند يضيفه. الناس كانت تستغرب وتقول لي: هو انت فاكر إن ده هيحصل؟ يا عم محضر ايه؟ إيه في إيه؟”
وختم شوبير تصريحاته مؤكدًا: “أنا ما قلتش حاجة غلط. ده الطبيعي والمنطقي. لازم يكون في جدول أعمال ومحاضر رسمية واجتماعات دورية. كده المؤسسات تمشي صح.”
