هاجم الإعلامي أحمد شوبير تصريحات حسام المندوه الحسيني، أمين صندوق نادي الزمالك، بعد كلامه اللي قال فيه إن «الزمالك كان مريض ودلوقتي بيموت»، مؤكد إن التصريح ده غير موفق تمامًا، وإن نادي الزمالك كبير ومستحيل “يموت” مهما حصل.
وقال شوبير في برنامجه الإذاعي صباح اليوم: “بص يا أستاذ حسام، لما تطلع في برنامج لازم تكون عارف بتتكلم مع مين ورايح تقول إيه، وتحدد أهدافك كويس. لأن في مذيع مهني، وفي مذيع طيب، وفي مذيع خبيث بيعمل كمين، وفي اللي بيدوّر على اللقطة. فخلي بالك كويس وإنت بتتكلم، عشان الكلام بيتحسب عليك.”
وأضاف: “في ضيوف كده أول ما تقول له إزيّك، يبدأ يحكي كل حاجة لوحده، وده بيوقع نفسه بنفسه، وده اللي حصل بالضبط في تصريحاتك يا أستاذ حسام.”
وتابع شوبير: “بصراحة، تصريحك عن إن الزمالك بيموت ما عجبنيش خالص. الزمالك عمره ما هيموت، ولا هيقع. ده كيان كبير، ممكن يمرض أو يتعب شوية، لكن عمره ما هيموت. الكيان ده أكبر من أي أزمة، ولازم تكون فاهم إنك بتتكلم عن نادٍ ليه تاريخ وجمهور بالملايين.”
وأكمل: “بعدها طلعت تقول إن كلامك اتفهم غلط وإنك كنت بتقصد الأزمة المالية اللي النادي بيمر بيها، بس يا أستاذ حسام، إنت اللي قلت الجملة دي مش إحنا. مفيش إساءة فهم هنا، الكلام كان واضح وصريح.”
وأضاف شوبير: “إنت قلت إنك كنت عايز توضّح حجم المعاناة اللي الزمالك فيها بعد سحب أرض أكتوبر، وإن في تبرعات من محبي النادي وأعضاء مجلس الإدارة، وإن رجوع الأرض دي هو الحل الحقيقي. تمام، كنت قولت كده من الأول وخلاص بدل ما تقول (الزمالك بيموت).”
واختتم كلامه قائلاً: “يا ريت نتعلّم نعتذر لما نغلط، مفيش فيها عيب. نطلع نقول: أنا آسف، كنت أقصد كذا وكذا. الاعتذار مش ضعف، بالعكس ده احترام للجمهور وشجاعة في الموقف. لكن نفضل نقول اتفهمت غلط؟ لا، الكلمة كانت واضحة جدًا.”
