في وقت يشهد النادي الأهلي حالة من الترقب بشأن منصب المدير الفني، خرج الإعلامي أحمد شوبير ليكشف أبرز الأسماء المرشحة، مشيرًا إلى تفاوض الإدارة مع أكثر من مدرب.
وقال شوبير في تصريحات عبر برنامجه الإذاعي صباح اليوم الأربعاء: ” الكلام على جيس كريستيان ثورب المدرب الدنماركي، هل في تفاوض مع الراجل؟ في كلام إنه في تفاوض معه، وفي كلام تاني إن أسامة هلال مدير التعاقدات والسكاوتنج في النادي الأهلي موجود في الدنمارك لإنهاء هذا التفاوض”.
وتابع: “الحاجة الثانية، امبارح فجأة كده اسم جوزيه جوميز طُرح وبقوة.. فاستنينا عشان نعرف القصة إيه، تواصلنا مع مسؤولين في نادي الفتح السعودي، وقالوا لنا بالحرف: “جوزيه جوميز مكمل معانا”، ده اللي قالوه”.
وأشار: “لما تواصلنا مع حد في النادي الأهلي، لم ينفِ ولم يؤكد، يعني ما قالش “لا” وما قالش “آه”، طيب… بعد كده الأصوات بدأت تقول: طب وموقف عماد النحاس إيه؟ هل عماد هيكمل؟”.
استطرد: “بصوا يا جماعة… قصة إن عماد مكمل أو مش مكمل، ده أمر يخص مجلس إدارة النادي الأهلي. هم ما خدوش قرار، لكن هم بيتفاوضوا. بيتفاوضوا وهو مرتاح. يعني إيه مرتاح؟ يعني عماد ماشي كويس، والدنيا ماشية معاه كويس، فما عندوش أزمة إنه يصبر وعلى مهله. ممكن يصبر لحد آخر 10، لأنه عنده ماتش مع الإسماعيلي، بعده توقف، لكنه راجع على طول”.
وواصل: “فممكن يستنى شوية، لكنه في النهاية… قصة إن عماد يبقى مدير فني مستمر مش شايف إنها مؤكدة بنسبة 100%، أو حتى بنسبة أقل من كده. لكنه بيحظى بثقة المجلس وبيحظى بثقة الجمهور كمان”.
واختتم: “ده عماد النحاس. على فكرة، كل الآراء كلها بتقول إنهم عايزين مدرب أجنبي، لكن كل شوية تظهر رسالة في النص تقول: “لا، عايزين كابتن عماد النحاس يكمل”.
