فجّر عصام الحضري، حارس مرمى منتخب مصر والأهلي السابق، تصريحات نارية عن الأوضاع داخل غرفة ملابس القلعة الحمراء، مؤكدًا أن “أوضة اللبس مولعة” بسبب كثرة النجوم وتفاوت العقود المالية بين اللاعبين، مشيرًا إلى أن إمام عاشور لم يُحدث أزمة حتى الآن لكنه “لسه هيعمل” في الفترة القادمة.
قال الحضري خلال ظهوره في بودكاست “Match Box”: “الأهلي فيه مشكلة واللي يقول غير كده كداب، شخصية المدير الفني ومدير الكرة لازم تكون قوية جدًا علشان تقدر تسيطر على النجوم الكتير في الفريق، لأن النجوم الكتير محتاجة إدارة مختلفة.”
وأضاف الحارس الأسطوري: “كل الناس بقت تبص على الفلوس، دلوقتي بنسمع أرقام خيالية، أنا كنت من أكتر الناس اللي بتاخد فلوس في جيلي وكنت باخد مليون جنيه في الموسم، لكن دلوقتي في لاعيبة بتاخد 40 مليون جنيه ومش عاجبها!”
وتابع الحضري: “أوضة لبس الأهلي مولعة ومش مظبوطة، لأن في لاعيبة كانت متفقة على 15 و20 مليون جنيه، وفجأة النادي زوّد المبلغ لـ40 مليون علشان مفيش مشاكل، وبرضو في لاعيبة مش راضية، وده بيأثر على الجو العام.”
واختتم الحضري تصريحاته المثيرة قائلًا: “إمام عاشور لسه معملش مشاكل، بس أنا شايف إنه جاي عليه الدور، ولسه هيعمل في اللي جاي، وده طبيعي مع الضغط الكبير الموجود في الأهلي.”
