”كلام عاطفي ومش في أيده حاجة”.. تعليق قوي لشوبير على بيان جون إدوارد عن وضع الزمالك! فيديو

تحدّث الإعلامي أحمد شوبير عبر إذاعة أون سبورت إف إم عن البيان الأخير اللي أصدره جون إدوارد المدير الرياضي لنادي الزمالك، وكشف عن رأيه في الموقف الحالي داخل النادي.

وقال شوبير: “جون إدوارد المدير الرياضي أصدر بيان كبير، والراجل كان زعلان شوية، بس اتكلم بمنتهى الحب ومنتهى الاحترام، ووجّه كلامه لجماهير نادي الزمالك”.

وتابع: “الحقيقة أنا شايف إن الموضوع غريب جدًا، لأن في النهاية الزمالك كان عنده ماتشين في الدور التمهيدي التاني للكونفدرالية الأفريقية، كسب الماتش الأول 6، وكسب التاني 1 من ضربة جزاء سجّلها سيف الجزيري، ومحمد السيد ضيّع ضربة جزاء، بس خلاص الماتش الأول كان محسوم”.

وأضاف شوبير: “الطبيعي إن المدرب في الماتش التاني يدي فرصة لعناصر تانية، ويشوف وجوه جديدة، خصوصًا بعد ما كسب الماتشين وما استقبلش ولا جول، بل كمان مرماه ما اتعرّضش لأي تهديد. خلاص الموضوع محسوم، اللعيبة بتتمرن عادي، وتقسيمة وكله تمام”.

وتابع: “الظاهر كده إنهم هيجيبوا كابتن أحمد عبد الرؤوف مكان كابتن حازم إمام اللي رجع تاني لقطاع الناشئين كنائب للقطاع. كنت قلتلكم قبل كده إن فيه أسماء زي عبد الرؤوف، وعلاء عبد الغني، ومحمود فتح الله، بس شكل الموضوع اتحسم لأحمد عبد الرؤوف. وده كله أمور بسيطة ومفيهاش أي مشاكل”.

ثم واصل قائلًا: “لكن فين بقى المشاكل؟ أقولك… بصراحة، ماينفعش كل شوية نفضل نساند ونسكت. جمهور الأهلي واقف في ضهر فريقه، تمام. لكن جمهور الزمالك ساعات بيتضايق بسرعة، ويبدأ يقول مين مشي ومين قعد ومين هيمشي!”.

وأردف: “جون إدوارد قالهم: يا جماعة، أنتم مش عارفين الصعوبات ولا المشاكل اللي بنواجهها، إحنا فعلاً في ظروف صعبة جدًا”.

ونقل شوبير جزءًا من رسالة إدوارد لجماهير الزمالك، وقال: “إدوارد قال: جماهير الزمالك في كل زمان ومكان، كلكم عارفين الأزمة المالية والمرحلة الدقيقة اللي بنمر بيها. الكيان ده مش هيقف غير بيكم، ومش هينهض إلا بدعمكم. أنا قبلت المهمة لأني مؤمن بيكم وواثق فيكم. لو تعرفوا اللي بنواجهه من عراقيل، كنتوا هتعذرونا، زي ما عوّدتمونا إنكم جمهور واعي ونبيل، ما بيتخلاش عن معشوقه مهما كانت الظروف. أنا مش بتاع هروب، وبوعدكم إننا هنكمّل ونحاول ننجح، لأن النجاح مش بالأفراد بس، لكن بالجميع وبالأيادي المتشابكة. وصّلوا الدعم، إحنا عارفين مطالبكم، وفاهمين غضبكم، وبنحاول على قد ما نقدر نحقق اللي بتتمنوه. الزمالك بيكم وليكم، وإنتوا سر بقائه”.

واختتم شوبير تعليقه قائلًا: “الكلام كله عاطفي جدًا، والراجل معذور بصراحة، هتقول له إيه؟ ربنا يعينه، هو واضح إنه بيحاول على قد ما يقدر، لكن الأمور صعبة فعلًا.”